جوزي ما بيحبنيش بقلم الكاتبة والأديبه هناء زغلول
جوزي ما بيحبنيش
بقلم الكاتبة والأديبه هناء زغلول
معظم الأجيال القديمة اتجوزوا جواز صالونات، يعني مافيش قصة حب تربطهم … وبيتقفل عليهم باب وبيخلفوا صبيان وبنات والحياة بتمشي …
محدش جه في باله يسأل شريك حياته انت فعلا بتحبني؟
ولا يسأل نفسه انا بحب الشخص اللي عايش معايا ؟
سؤال لو وقفنا عنده وصممنا علي معرفة إجابته بيوت كتير هتتهد ….
ممكن بسبب ان مافيش اجابة
او لان محدش فعلا عارف يقيم احساسه تجاه التاني
او محدش اتحط تحت اختبار بجد وجاتله فرصة انه يتعامل مع شخص جديد وينجذب له .
بتعيش حياتك كلها وانت مش عارف اللي بينكم دا حب ولا عٍشرة،
بس في نتيجة حتمية وهي التعود علي الأشياء والأشخاص، بيعمل ترابط روحاني من نوع خاص بتحس انك مش هتقدر تتعامل مع حد تاني غير الشخص اللي عاشرته لسنين طويلة وفهمت طبعه و عيوبه ومميزاته …
بتكون خلاص استسلمت ومعندكش طاقة تغامر وتدخل تجربة جديدة …
وكل دا تحت مسمي العشرة مش الحب
كتير مننا بيبقي عايز يصدق انه حب… وفي اللي بيتوهم حالة الحب لكن نماذج الحب في الزواج قليلة الحب بمعناه الحقيقي مش الكلمة اللي بتتقال في لحظة روقان
الحب اللي بيبان وقت المرض والحزن وقت ما تنطفي وحبيبك الوحيد اللي شايفك منور …وقت ما تنكسر وهو اللي يسندك لما الكل يسيبك… الحب اللي بتحسه في نظرة العين ولمسة الايد ….
العٍشرة اللي بين الأزواج أوقات بتكون اقوي من الحب وهي اللي بتعمر البيوت وبتحافظ عليها
بلاش ندور علي مسمي للارتباط سواء حب او عٍشرة الاهم الرضا بالمقسوم
