حزن محوج .. 1.. بقلم/ عاصم المركبى

السّما

الدور السادس

شقّة اتنين

أُمنيّة

يا تاريخ الأمم السابقة

وعلم النفس

والفلسفة والمنطق

وأخطر غارَة على الأيام وِدِّيَّة

**

عارف إن الإسم ــ ماهوش أُمنية

إنتِ الأُمنيّة

وإن الاشخاص في قصايدي

زي التفاصيل ــ خيالية

وإنك مش أخت ريهام

وآمال مش دلوعة الحتة

ورحمة وطنت دعاء وسماح

مكياج الحَبّكة الفنية

ومريم ــ إسم أنا برتاح له

أكيد بدوافع طبيعية

**

من قبضة لأثرك ــ جندت العالم

وانا لو فنان ــ علشان حبيتك

ومافيش حاجة تمس حياتي

بشكل مباشر ــ غيرك إنتِ ــ

بصفة شخصية

فعلاً ــ لولا وجودِك

تبقى التواريخ وهمية

والعصافير وهمية

والورد بلاستيك

واللون الأخضر دم الأشجار

وكل آلات العزف شجار

وعجايب الدنيا لحد الآخرة

من لمست إيدك ع الأشياء

واقعية

**

أُمنية ــ فلانة ــ الأنثى إللي كتبتلها الشِعر

حُزن محوّج

أصدق كدبه ــ عشان أثبتلك ــ

إن أنا من غيرك

همجي ــ عشوائي

والأرض لو مافهاش انتِ

تبقى العدميّة

والكون لو فاتن ــ

فاتن بس عشان شُفتيه

شافِك إخترع البَشريّة!