فتافيت حلم بقلم الكاتبة والأديبه نجلاء عزت
فتافيت حلم
بقلم الكاتبة والأديبه نجلاء عزت
ع الريق بنبلع برشامات الصبر
ونسمّي نبدأ يومنا يا فتاح
ونقول دي دنيا بجرحها هتمر
ماهو ياما مرّت قبل منها جراح
ونشد فوق كتف الشقا التدابير
ونعشّم الأحلام بفجر الخير
ونمد إيدنا تلملم الفتافيت
ونعيش بقية الحلم في الأساطير
يلضم مسانا صبح متعجّز
على صدر شب يا دوبه متجوّز
حنة عروسه ناطقة في كفوفه
والحزن فوق الخد متبروز
يا دابحة حلمي فوق قضيب القطر
العمر راح بين الشقا والفقر
وعدتي قلبي بالهنا وضاعت
كل الوعود والقلب مات م القهر
آه ع الجدع
آه ع الجدع لما يهده الدَّين
وتغربه مدن الشقا فدادين
ويموت فِدا دَين اللي نهبوا شقاه
يا أمايا آه دا في أي شرع ودين
مد الخطاوي دا الطريق عطشان
عرق الجبين دا زينة الغلبان
مد إما توصل يم بكرة تطل
شمسة كانون بشعاع دفا وأمان
حلم الغلابة مش بواقي طحين
ولا عمره كان القصر والبساتين
حلم الغلابة نجمة وناسة
وإيد بتحضن كل قلب حزين
نسمة في ليلة صيف
و يادوب غموس ورغيف
وكف جف عفيف
محسوب من العايشين
بقلم #الأم_لولو نجلاء عزت
