عندي مراهق ج٣ بقلم هناء_زغلول
عندي مراهق ج٣
بقلم هناء_زغلول
في كل جزء بنحاول نخترق الحاجز النفسي اللي عايش فيه المراهق وعامل عازل بينه وبين اهله
عايزين نعرف
ليه المراهق بيتشد للاصحاب وبيسمع ليهم اكتر من الاب والام ؟
ببساطة لانه ضامن تمسك اهله بيه، وانهم نقطة الأمان بالنسبه له إنما هو حابب يحس انه مهم وسط المجموعة اللي حواليه، عشان كده بيتودد لهم و بيبين قدامهم احسن صفاته ،
هتلاقيه جدع جدا مع اصحابه، اللي بيتقال عليه صاحب صاحبه ودايما في ضهره، لو صاحبه محتاجه الفجر هينزله بدون تردد ،
دا بالنسبه للولد المراهق
اما البنت هتلاقيها لازقة لصحبتها ليل ونهار وممكن تبات عندها، و تحبها اكتر من اختها وكل دا بردو عشان تحس بأهميتها وتكون ليها العالم الخاص بتاعها
في أثناء الأحداث دي المراهق مش حاسس بأهله ولا بمشاكلهم ولا يعرف حاجة عن البيت، غير انه مكان للنوم والاكل والفلوس ،
الاب والام لما بيسالوه رايح فين وجاي منين، بيحس انه تدخل في حياته الخاصة وبيرد عليهم بالعافية، اللي هو انا كده عامل معاكم الواجب وزيادة، المهم ياخد منهم اللي عايزه وينزل
دور الاهل هنا انهم لازم يعرفوا أصحاب اولادهم مش اقصد انهم يقعدوا معاهم ويتكلموا إنما علي الاقل اعرف البيئات اللي متربيين فيها و يكونوا متقاربين في التربيه والأخلاق والمستوي الاجتماعي مش( المستوي المادي )
وبين كل فترة والتانية اسأله سؤال غير مباشر عن أصحابه، وندردش مع بعض شوية من الدردشه هتفهم تفاصيل علاقته بيهم و اللي بيعمله بره البيت في خروجاتهم ولو فيه حاجة عايز توجهه ليها يبقي بهدوء من غير عصبية،، تعرفه الصح من الغلط وتحسسه ان كلامك له دا نابع من خوفك عليه وحبك مش لأنك ابوه ولازم يسمع كلامك، مش أوامر عسكرية، لانه هيقفل الحوار معاك ومش هيتكلم تاني فبلاش تقفل الباب بينك وبينه لازم تسيبه موارب
انتظرونا مع الجزء الرابع
