الحب ورطة بقلم الأديبة هناء زغلول
الحب ورطة
بقلم هناء زغلول
بصي يا بنت الناس كل الكلام المعسول اللي بتسمعيه من راجل لسه علي البر، دا بيبقي جر رجل،
يعني بيوقعك في غرامه ويعلقك بيه عشان ماتقدريش تستغني عنه وتتعودي علي كلامه الحلو وتتخدري لحد ما توصلي لدرجة الإدمان في العلاقة وبعد كده هتبقي لعبة في ايديه، يتحكم فيكي زي ما هو عايز واول ما تطلبي منه ارتباط رسمي، هتبقي بالنسبه له ورطة كبيرة،
مش هيشوف غير انك بتدبسيه زي ما يكون اتفاجئ ان دا الوضع الطبيعي بعد قصة الحب
وهتلاقيه اتحول وبقي واحد تاني ماتعرفهوش وكل العيوب المستخبيه هتطلع لحد ما انتي اللي هتقرري تسيبيه
ودا بيحصل كمان مع الستات المتزوجة تلاقيها تميل لواحد بيسمعها كلام حلو ويتحجج بانها علي ذمة راجل تاني وأنها لو فاضيه كان عمره مايسيبها تروح من ايديه، و أول ما يحصل بينها وبين جوزها مشكلة، ويحس انها ممكن تسيبه وتطلق هيشوفها بردو ورطة وهيتحول وهيطلع كل اعذار الدنيا اللي ماكنتش موجوده من كام يوم، وكان وقتها هيموت ويتجوز المدام بس يا خسارة ما بقتش ظروفه تسمح
البنات والستات بقوا فريسة سهلة في ايد رجالة معدومة الضمير، كل همهم انبساطهم ونفسهم ولازم كل واحدة تحافظ علي نفسها وماتأمنش لحد بسهوله الراجل الملتزم بيبان من تصرفاته واللي عايز يلعب بيكي بردو بيبان
احنا في زمن كله غدر وخيانة ونادرا لما هتلاقي إنسان بيخاف ربنا ويحافظ عليكي حافظي انتي علي نفسك
