بشرى توجه رسالة لـ نجل تامر حسني بعد تعرضه لوعكة صحية

وجهت الفنانة بشرى، رسالة لـ أدم نجل تامر حسني، بعد تعرضه لوعكة صحية و إجرائه عمليتين جراحيتين.

ونشرت بشرى “ستوري” عبر حسابها الشخصي بموقع إنستجرام وعلقت قائلة: “ربنا يطمنك عليه يا تامر ويشفيه ويعافيه، مفيش أغلى من الضنا”.

حرص الفنان تامر حسني على توجيه الشكر لكل من سانده ودعا لنجله آدم، في أزمته الأخيرة، بعد تعرضه لوعكة صحية، أجرى على إثرها عمليتين جراحيتين.

وكتب تامر عبر صفحته الشخصية على موقع التواصل الاجتماعي فيسبوك: “أنا مش عارف أشكركم إزاي على كمّ الدعوات اللي دعيتوها لربنا لشفاء آدم ابني اللي جاتلي منكم هنا و على تليفوني تليفونات كل المحيطين بي هو عمل عمليتين كبار بسبب انفجار الزايدة المفاجئ، اللي كانت أعراضه سخونية عادية بس وبقولكم كده عشان تبقوا حريصين مع نفسكم أكتر ولولادكم. ومش كل سخونية تقولوا ده شوية برد”.

وتابع: “روحوا اكشفوا كويس و اعملوا سونار على البطن الزايدة مرة و2 عشان برضو ساعات مش بيبان ولازم الدكتور يضغط بطريقة معيّنة، تقريباً أقوى شوية عشان يعرف، لإني سمعت كتير اليومين دول إن الزايدة خادعة، اطمنوا كذا مرة قبل لحظة انفجارها عشان بجد مشاكل بتحصل بعدها كبيرة ومحزنة أوي وحبيبي آدم عمل عمليتين صعبين أوي عليه وبدعواتكم مستنيين النتايج تكون خير يارب و يعدي مرحلة الخطر يارب، بحق كن فيكون، اشفيه وعافيه، هو و كل ولادنا، بس هو راجل و هيتحمل وإن شاء الله ربنا يكرمه و يعافيه و يحفظه هو و إخواته و يحفظ كل ولادكم يارب”.

واختتم: “أحب أقول تاني شكراً من كل قلبي على دعواتكم، أنا شايف قلب كل حد فيكم و هو بيدعي بصدق، متشكر أوي يا جماعة شكراً لكل اللي اهتم وسأل عن ابني و دعاله هنا أو على التليفون، واللي طلعوله صدقات لشفائه من غير ما يعرفونا شخصياً.. أنا مش لاقي كلام أشكركم بيه و أنا برضو بدعيلكم، وبقول لكم مثلها وأضعاف أضعافها، وربنا يحفظكم ويحفظ أولادكم قادر يا كريم”.