حزن محوج.. 7 .. بقلم/ عاصم المركبي

فات سِت شهور

يوميًا أروح له الدُّكان

لاجل اتعلِّم

المنهج صعب

لُغة الإشارات أصعَب حاجة

لِبَشَر لو نايمة بِتتكلّم

مِ الشهر التاني ــ بدأت تكرّر زيارتها

وأنا قاعد مع جُوزها بخيت

الروح في جمالها بتتأَلّم

**

أوقات ضَهري يكون للشارع

وبَحِس بنغَمِة خَطوِتها

الصُّدفَة لا يُمكن تِتكرّر وبحذافيرها

وما دُمت نويت إني اتعلِّم

لُغة الإشارات

أَفهم مضمونها وتفاصيلها

**

عَصَّارة أبو فادية 

في لقاء عابر ــ كات رَحمة أنيقة وجَذَّابة

ورِيحتها موسيقى وكلامها موسيقى

إن مِشيت حافيَة على الأسفلت 

هانشُوفُه حَديقة

حاوِلْت من الشهر التالت ــ تبقَى لي صَدِيقَة

عَلشان وَهَّابَة

قلبي من يوم ما بدَأنا كلام

لا مبَطَّل فِكر ولا كتابَة