فى تأبين دكتور محمد السيد إسماعيل              بقلم صابر قدح 

فى تأبين دكتور محمد السيد إسماعيل

بقلم صابر قدح

ياضحكة على شفايف مصر فين بالاقيك

يابسمة شايلة رايات النصر مين يجاريك

براءةالطفولة. عنوان للرجولة. بحر العلوم

على كل ابداعك ربنا ياحبيبى يجازيك

كنت شايل على اكتافك هم الأوطان

زى السواقى بتسقى العود العطشان

تجمع على السطر حروف الإنسان

تبنى للوطن معزوفة من الألحان

أمير النقد والبُنا ليك عنوان

كنت حالف ماتسكت على طغيان

ترسم جناين ورد على الأكفان

شايل هم السنين على الأجفان

كنت فارد دراعك للأمل مليون فدان

تزرع أمانى الوطن غصب عن الأحزان

مين يقول انك مش حاضر معانا

واللا غبت لحظة عن لقانا

واللا سبت فى يوم حمانا

دانت الصدر اللى مليان حنان

والعمر اللى غرقان امان

انت الزمان والمكان وحلاوة اللسان

اياك تسيب غلابة الوطن وانت الضمان

بيقولوا عليك نص ضحكة الوطن

وانا باقول. انت الوطن

وانت الفرحة للى شايلة لينا بكرا

انت الذكرى الجميلة والفكرة

والله يادكتور دموعى مش قادرة

شايلة شعاع الشمس وفاردة

الحنة على إيد البنات

والشباب اللى بيبات

يحرس رموش الصبايا

كله إلا… ان يقولوا العمر فات

والقلب الكبير والضحكة الصافية

والنبض اللى فى عروقنا مات

ياضحكة بلد حرام تبات

العيون غرقانة بالأحزان

ولحد ما ينبِّت عنقود العنب

والرمان

هايجمّعنا الزمان

على أحلى صحبة فى جنة الرضوان

فى جنة الرضوان

صابرقدح