الفنانه برلتني فؤاد تنعي المخرج سامح عبد العزيز علي صفحتها بموقع التواصل الاجتماعي فيسبوك

وليد محمد
نعت الفنانه برلتني فؤاد علي صفحتها الرسميه بموقع التواصل الاجتماعي فيسبوك المخرج الراحل سامح عبد العزيز ألذى توفي فجر امس الخميس بعد صراع مرير من المرض وقالت الفنانه برلنتي فؤاد مات اللي كان حاسس بينا وعاوزانا نتشاف
مات اللي كان مؤمن بموهبتنا ودايمًا بيشجعنا من قلبه.
مات اللي كان بيختارنا لأعماله المهمة عشان نتشاف ونكبر وسط الناس
اللي فضل يآمن بيا وبقدرتي ويديني فرص حقيقية في شغل ليه اسمه وقيمته.
اول مقابله من سنين كانت في نادي الطيران اول ماشافني انا واخويا قالي عيد ميلاد بنتي تعالوا انا عازمكم وسعتها كان بيصور مسلسل فيفا اطاطا للنجم محمد سعد وعازمني علي التصوير كنت وقتها لسه صغيره
عرفته من أكتر من 15 سنه
مرت الايام ورشحني هو والأستاذ حسام الشربيني في مسلسل خيانه عهد امام النجمه الكبيره يسرا وبعدها تولت الأعمال في أكتر من عمل معاه وليا الفخر اني اشتغلت في اعماله المهمه
مش مجرد مخرج اشتغلت معاه، لكنه كان إنسان كبير بجد
كان حبيب والدي الله يرحمه وكان بالنسبة لي أخ كبير

كان دايمًا في ضهري، شايفني قبل ما الناس تشوفني
وكان كل ما يشتغل في حاجة مهمة، يكلمني يقولي: “أنا شايفك في الدور ده”
وأنا من كتر ثقتي فيه، عمري ما سألت هعمل إيه
كنت بدخل التصوير وأنا واثقة إن وجودي معاه خطوة لقدام

آخر عمل جمعنا كان مسلسل “شهادة معاملة أطفال” للنجم محمد هنيدي رمضان ٢٠٢٥
كلمني وقتها وقاللي: “أستاذ حسام هيكلمك في شخصية”
وفعلاً صورت على طول
لأن لما هو بيرشحني في حاجه هو واشتاذ حسام كنت عارفة إنه شايف حاجة مش أي حد بيشوفها.
وبعد ما خلصت شغلي في المسلسل
كلمني وقالي: “تعالي الفركش في مدينة الإنتاج الإعلامي تحتفلي مع أبطال العمل
ما رحتش…
ماكنتش أعرف إنه كان بيودعنا من بعيد.

وبعدها باركلي على مسلسل جديد دخلته
وبعتلي على الواتس: “خلينا نشوفك قريب”
ماكنتش عارفة إنه كان بيودعني للمرة التانية

هو الأستاذ والمخرج الكبير سامح عبد العزيز
كان إنسان حقيقي… أخ كبير…
كان بيشوف اللي جوانا قبل ما إحنا نشوفه،
وكان سبب في إن ناس كتير تتشاف وتبدأ وتلمع.

ربنا يرحمه ويجازيه خير على كل لحظة آمن فيها بينا…
ويسامحه على وجع الفقد اللي سابه جوانا