معارضة شعرية قصيدة اناحرمة صابرقدح
معارضة شعرية قصيدة اناحرمة
صابرقدح
كتبت قصيدة تعبر عن معاناة المرأة وإن كانت محقة فى بعض النقاط
الشاعرة حنان شاهين قالت —-
أنا حرمة …
و صوتي عندهم عورة
و صورتي حرام
و كارثة اني حطيتها في يوم ع الفيس
و اسمي عيب أقوله لحد
أنا أم احمد
و صورتي زهرة الصبار
أنا حرمة
و مطلوب مني أدارى في ضل الحيط
أنا ما أملكش مفتاح باب
و لا رخصة
و لا مسموح لي
ادوس بنزين
و اسوق الدنيا لو مرة
و لو مسموح هاكون خايفة
بترهبني عيون الناس
و آذانهم
و خايفة من أذى لسانهم
أخاف و أنا ماشية في الشارع
لو ابن حرام يعاكسني
يشوه سمعة العيلة
و أشيل وحدي أنا الليلة
أكيد هيقولوا دا ذنبي
أنا اللي غاويته في الأول
عشان هب الهوا
و بيًن تفاصيلي
و هو شباب
هاكون برضه أنا الجانية
و حتى لو بدون أسباب
و كان الصح
ألزم بيتي م الأول
و لا أخرجش
في مجتمع الرجال
نكت بايخة ما بتضحكش
حكاوي كتير بيحكوها
في سهراتهم
و يتفاخروا بصولاتهم
و جولاتهم
اخويا بيحكي قدامنا
مغامراته و ما بيخجلش
عشان من صغره إتجرأ
يقول ما يخافش
يصاحب بنت ولا اتنين
يصاحب حتى بالعشرة
و أمي و أبويا يتهامسوا
فيما بينهم
دا واد عفريت
لكن لو مرة أنا حبيت
يتمنع الهوى عني
و بسرعة يزفوني ل بيت عدلي
عشان أبقى في حما راجل
يادوبك شافني بالصدفة
و بعت أمه تقول لأمي
و أمي الفرحة من يومها ما ساعتيهاش
عريس لقطة معاه قرشين
و ملو العين ما يتعيبش
و ما يعيب الرجال
إلا قليل القرش
و دا دفيان
جايب شبكة
و معاه شقة
و خلاص خلصت دبلومي
و ماليش حجة
هنيالي
أكيد كات أمي دعيالي
و هاروح وياه السعودية
و رحت معاه
أنا و شنطة هدوم
كانت في يوم الوان
خبيت جوا جيب سري
قصايد كنت كتباها
ضاعت كلها مني
و أنا باختم جواز سفري
و صورة كنت رسماها
بهت لونها مع الأيام
و كل العالم اتحول
للون واحد
بفعل الامر :
: هدومك كلها سودا
: نقابك فرض مش سنة
: بيتك هو مملكتك
: خروج ممنوع بدون إذني
: سفر ممنوع بدون محرم
: ….
: ….
بقيت بلا فخر بعد شوية
أم أحمد و أم حسين و أم ياسين
و زاد قدري عشان خلفت رجالة
و مكتوبلي أعيش و أموت
و أنا على نفس دي الحالة
و لما اموت هاخش الجنة
برضه باذن أبو أحمد
..
في مجتمع الرجال
ما خدتش ورثي من أبويا
يادوب قرشين
و أكون ممتنة لأخويا
عشان ما أكلش زي كتير
حقوق البنت في ميراثها
و أخد البيت و أخد الغيط عشان راجل
و كتر خيره
لولا وجوده في الدنيا
كان عمي هايورثهم
في مجتمع الرجال
أنا محظوظة باخويا و بولادي
و بجوزي اللي خاف الله .
و جاب ضرة بشرع الله
و واجب برضه
أكون ممتنة من قلبي
و داعيه
و واجب برضه أتحمل
و أخلص قلبي م الغيرة
و لو مال عني طول العمر
ما يصحش أجيب سيرة
و أتكلم كلام ماسخ
ما يتقالشي
ما دام بعدل فيما بينا
( بما يملك )
ينام عندي هنا ليلة
و يصحى عندها ليلة
هالومه ليه
ما أنا اللي فشلت ألبي احتياجاته
في ليلة كنت تعبانة
و ليلة كنت زعلانة
مع الدنيا و بات غضبان
و كل ملايكة السموات
لحد الصبح تلعني
مع إني
طلبت كتير يسامحني
و يبدو انه ما سامحنيش
و جاب ضرة في عمر ابني
و إيه يعني ما هو راجل
و حقه يعيش
….
في مجتمع الرجال
أنا أشبه لقالب طوب
ما بتحركش من الحيطة
ما باتمردش ع المكتوب
هيحصل إيه لو اتمرد
هايتكسر لميت حتة
و إيه يعني
ياريت يحصل
و يتكسر ل ١٠٠ حتة
و يتحول لحبة طوب
و أحدف طوبة في اللي ضربني و أنا طفلة
عشان نطيت في مرة السور
و ساب كل الولاد عادي
و هاحدف طوبة في اللي وصفني بالنقصان
و في اللي صادر الأحلام
و أنا لسه في صبا عمري
و أحدف طوبة
في الواد اللي حط ايديه
على صدري
و قاللي كلمة جرحتني
و مشي يضحك بسخرية
عشان ما قدرتش أتجرأ
و أقول عمل ايه
و طوبة كبيرة هاحدفها
بكل ما فيا من قوة
في ست غبية
كنت باشوفها
طول الوقت محنية
و كل ما قول لها قومي
إفردي طولك
تقول ما أقدرش أنا ولية
و جناحي من زمان مكسور
هاحدف طوب كتير في الخوف
و أحدف طوب كتير فيا .
بقلم استاذتنا العظيمة الشاعرة الفاضلة
Hanan Shahin
وعارضتها بقصيدتى
صابرقدح
انا حرمة
وضلوعى معووجة
وحاجات….. كتير
بتخلينى موجوعة
ونغمة النقص هيا
اللى عليا مسموعة
بيقولو عنى مكارة
بيقولو انى موسوعة
وانى ألة جذب.
لكل خلاعة وميوعة.
وساعات يقولوها عليا
انى ناقصة وملسوعة
بيحاولوا يطفُّو الشمس
اللى بوجودى مرفوعة
انا نص الكون
ووالدة كل الكون
والجنة من غير رضايا
ممنوعة
والبركة اللى ف وجودى
ومن غيرى منزوعة
انا الجمال انا الخيال
انا السهره انا الغنوة
وبكل حلاوة مطبوعة
أنا الحتة الطرية والكلمة
الحلوة مبلوعة
أنا اللى ف كل الكون
سايقة ودلوعة
باطير فى كل سما
بالحب مدفوعة
وقوّتى ف نقصى
وللعمار موضوعة
سنين العمر تحلى ويايا
وارضى بالكلمة وقنوعة
شيلوا عنى عيونكم
لتصبح عامْية مقلوعة
انا البنت انا الزوجة
انا الأم والجنة تحت
رجليا موضوعة
انا سكنك انا خدمك
وليه تخليني فيك
مخدوعة
وانت من غيرى حلم طيارى
قلب من غير نبض
لاصوتى عورة ولاصورتى
حرام
إلا لأنى جوهرة مكنونة
وباسوق الأمم من ورا الستار
واربَّط الحِزَم ضد الإنكسار
من حضنى بيكون الرئيس
والقائد والمهندس والعريس
ماتنفعش صورتى على الفيس
ولا تتحط ف اعلان تخسيس
مابخافش من أذى الناس
ولا ينفع اتحط ورا ترباس
هدومى تفرضها الحشمة
وجسدى مش عرضة ولانهيبة
ومش أى حرمة بتبقى مصيبة
اللى بيحاربونى عايزنى سلعة
يعرضوها فى صالات مريبة
ولأنى حرمة ومصونة
هافضل أنا الجوهرة المكنونة
باصنع تاريخ للناس
وادَرّب الحراس
لأنى حرمة وأم لكل الناس
وأم لكل الناس
صابرقدح
