بنك المشاعر

كتبتها :د/ ماهي احمد
زي ما البنك في الفلوس، في حياتنا بنك تاني أخطر وأهم: بنك المشاعر.
بنك غير مرئي، لكن رصيده بيبان في كل علاقة، وكل موقف، وكل لحظة ضعف أو قوة.
قلب الإنسان حساب مفتوح.
كل كلمة طيبة إيداع،
كل احتواء وقت الضيق رصيد،
كل تسامح عن وجع قديم زيادة في الحساب.
وفي المقابل، القسوة سحب،
التجاهل خصم،
والخذلان ديون تقيلة بتفلس القلوب لو زادت.
المشكلة إن ناس كتير بتسحب طول الوقت من غير ما تحط حاجة.
تطلب حب وهي مش بتدي،
تستنى تفهم من غير ما تحاول تفهم،
تزعل لو القلب فاضي وهي أصلًا عمرها ما استثمرت فيه.
بنك المشاعر محتاج إدارة واعية.
محتاج تعرف إمتى تدي، وإمتى توقف السحب،
وإمتى تقفل الحساب اللي بقى استنزاف مش علاقة.
والأهم… حسابك إنت.
هل قلبك مليان ولا مفلس؟
هل سامحتي عشان ترتاحي ولا ماسكة الوجع كوديعة مسمومة؟
هل بتغذي نفسك حب، ولا مستنية حد يحولك رصيد؟
الحقيقة النفسية البسيطة:
اللي قلبه غني… بيعرف يحب،
واللي قلبه مفلس… بيطالب، يتخانق، ويكسر.
املي بنك مشاعرك الأول.
حب، تسامح، وحنية على نفسك.
عشان لما تيجي الخسائر…
ما تفلسيش من أول صدمة.