الضحية بقلم الأديبة هناء زغلول
الضحية
كتبت – هناء_زغلول
كتير مننا فاكر نفسه ضحية أو مجني عليه
مع انه لو شاف الأمور من بعيد وخرج بره مشكلته ونزل لأرض الواقع وتخلى عن الأوهام اللي بتدور في رأسه هيقدر يقيم مشكلته بحيادية اكتر … هيلاقي نفسه ولا ضحية ولا حاجة وهو اللي ادى لناس في حياته اهميه أكبر من اللازم ونفخهم لحد ما فرقعوا في وشه ..
هتشوف قد ايه انت الظالم، ظلمت نفسك بإيدك مادتهاش حقها وقللت منها عشان حد مايستهلش ولا عمره قدر تضحيتك …
بلاش تعيش دور الضحية وتشتكي وانت اللي بكامل إرادتك اخترت الدور دا واندمجت فيه لدرجة التقمص بقيت ممثل بارع بتنزف من جواك وراسم على وشك ضحكة كدابة.
كل اللي هيشوفك من بعيد هيحسدك على السعادة اللي انت فيها …وهتفضل تكمل فصول المسرحية الهزلية لحد ما الوقت يمر وهتتفاجئ بنزول الستارة والعرض ينتهي بمرور العمر وتنتهي حياتك وانت فاكر إنك ممثل بارع والكل بيصقفلك والحقيقة إنك ضيعت عمرك في فيلم هابط
وطلعت بطل من ورق.
#من_الحياة
