ستات عينها زايغة كلمات الكاتبة والأديبة هناء زغلول
ستات عينها زايغة
بقلم هناء_زغلول
زي مافيه رجاله عينها زايغة، في كمان ستات عينها زايغة ما احنا كلنا بشر ونفوسنا ضعيفه ولينا لحظات ضعف مافيش فرق في الاحساس والشعور بين راجل وست .
الغرائز بتتحكم في تصرفات البشر مع اختلاف الجنس
بس في فرق بين ست بطبيعتها عينها زايغه وبين ست اتعرضت لضغط نفسي وصلها للنظر لغير زوجها
في الحالتين في معصية للخالق زي اي معصية بيقع فيها الإنسان، بسبب ضعفه او قلة إيمانه او اي سبب يوقعنا في المعاصي .. يعني اي كلام هنقوله في الموضوع دا مش مبرر للمعصية إنما دا واقع وبيحصل وبنحاول نعرض المشكلة و نبحث لها عن حل
اولا في سؤال بيفرض نفسه
ليه الست ممكن تنجذب لحد تاني غير زوجها ؟
للاجابة عن السؤال، لازم نفرق بين ست بتنجذب لشخص آخر لان بطبعها عينها زايغة
وست زوجها كان هو السبب وراء انجذابها لغيره
في حالات بيكون سوء معاملة الزوج و التقليل من شأن زوجته واهماله لها بيعمل فتور في العلاقة بينهم بيحسسها انها شئ غير مهم في حياته و كأنها قطعة جماد
فيبتدي يبعد عنها، و الزوجة تحاول تشغل نفسها
وتختلط برجال في محيط العمل أو الأقارب او الانديه
والاحتكاك هيقربها من ناس عمرها ما كانت بتفكر فيهم بس الفراغ العاطفي والإحساس بالقهر بيكون سبب انجذابها لأي شخص هتتقرب منه وهتكون ضعيفه الإرادة
النوع دا من الستات بتكون في صراع نفسي بين تربيتها واخلاقها اللي اتربت عليها وخوفها من ربنا وبين إحساسها بالانتقام من زوجها اللي حاسه تجاهه بالقهر والذل
وغالبا بترجح كفة اخلاقها وضميرها وتكتفي بأن تكتم مشاعرها داخلها وما تصرحش بيها…
النوع التاني اللي الست بطبعها عينها زايغة دي بتكون مريضة نفسية عندها عقدة نقص بتحب تشبع رغبتها في نظرة كل راجل ليها و انه يتغزل في مفاتنها
مش عايزه تحس انها انطفت او عامل السن أثر عليها ..وممكن تكون مراهقه متأخره زي اللي بيحصل للرجاله بالظبط..
بس بما اننا مجتمع شرقي ما نقدرش نصرح بكلام زي دا ولا نواجه نفسنا ان في مشكلة زي دي موجوده في مجتمعانا
بالعكس كل ما نواجهه مشاكلنا و نعترف بيها هندور لها علي حلول و نعالجها قبل فوات الأوان
ونصيحتي لكل راجل وست راعوا ربنا في بعض
دوروا علي الحلو اللي جوه كل واحد حاولوا تحتوا بعض قبل ما تبقوا زي الاغراب وعايشيين في بيت واحد
