انت ترى ما بداخلك

كتبت مارينا مدحت
التنمر بقى حاجة منتشرة جدا حوالينا، سواء في الشارع أو الشغل أو أكتر على السوشيال ميديا. ناس كتير بتأذينا بكلامها، بتعلق على شكلنا أو طريقتنا أو حتى اختياراتنا، وكأن ده حق مكتسب ليهم. بس الحقيقة المهمة اللي لازم نفهمها هي فكرة “أنت ترى ما بداخلك”. يعني إيه؟ يعني كل إنسان بيشوف الدنيا ويعبر عنها من خلال اللي جواه هو، مش من خلالك انت

المتنمر في الغالب ، اتربى في بيئة فيها قسوة أو نقد أو تقليل. فكبر وهو شايف إن دي الطريقة الطبيعية في التعامل، وابتدى يطلع اللي جواه على غيره. فبدل ما نشوف كلامه على إنه حقيقة، لازم نفهم إنه مجرد انعكاس لحالته هو.

عشان كده، مهم جدا ما نسمحش لكلام المتنمر يدخل جوانا أو يأثر على ثقتنا بنفسنا. إنت مش زي ما حد شايفك أو بيقول عليك، إنت أعمق بكتير من كده. قوتك في إنك تبقى فاهم نفسك وعارف قيمتك.

وبرضه مسؤوليتنا إننا نربي أولادنا على ده من بدري. نعلمهم إنهم يحترموا غيرهم، ونفهمهم إن كل واحد فينا مختلف ومميز بطريقته. وكمان نديهم أدوات يحموا بيها نفسهم لو اتعرضوا لتنمر، زي إنهم ما ياخدوش الكلام بشكل شخصي، ويتكلموا مع حد بيثقوا فيه.
حماية نفسك من التنمر بتبدأ من فهمك لطبيعة الإنسان اللي قدامك، وفهمك لنفسك أكتر. كل ما كنت واثق في نفسك وعارف أنت مين، كل ما أي كلام سلبي هيعدي من غير ما يهزك. لأن ببساطة، الناس بتعكس اللي جواها… مش حقيقتك إنت