انت ترى ما بداخلك
كتبت مارينا مدحت
الوعي مش دايماً بيكون مريح، بالعكس أوقات بيكون صادم جداً. أول ما الإنسان يعرف معلومة جديدة أو يشوف الحقيقة بشكل مختلف، بيحس بصدمة جواه. لأن الحقيقة احياناً بتكسر أفكار كنا متعودين نصدقها طول عمرنا.
وقتها محتاجين نواجه نفسنا بكام سؤال:هل هننكر؟ نهاجم؟ نهرب؟ولا هنحاول نفهم ونتغير؟
التغيير مش سهل، ورحلته شاقة، لكنه يستاهل. لأن الأصعب من التغيير إن الإنسان يفضل واقف مكانه، مش قادر ياخد خطوة لقدام. التغيير محتاج شجاعة، قوة، التزام، حركة، واستمرارية.
كل شيء له ثمن. لو قررت تتحرك للأمام، فثمن ده التعب، لكن نتيجته النمو والنجاح. ولو قررت تفضل مكانك، فثمن ده إن الحياة تعدّي وأنت ثابت، لأن الكون كله قائم على التطور والحركة.
الوعي الحقيقي مش إنك تسمع كلام عميق أو تقرأ كتب كتير، الوعي الحقيقي هو: إيه اللي اتغير جواك بعد ما فهمت؟ هل طريقة تفكيرك اتغيرت؟ هل بقيت أهدى؟ أرحم؟ أنضج؟ هل قربت من ربنا أكتر؟
لأن الحياة مش بتحصل عبث. كل موقف، كل صدمة، كل علاقة، وكل تجربة ممكن تكون رسالة من الله عشان نصحى ونبقى أوعى وأقوى وأقرب لنسختنا الحقيقية.
المشكلة إن ناس كتير بتحب فكرة الوعي، لكن بتهرب من التغيير الحقيقي. مع إن المعلومة لو ما غيرتش الإنسان، تبقى مجرد كلام مر عليه وخلاص.
عشان كده مهم كل يوم نسأل نفسنا: إحنا بنتعلم إيه؟ بنتطور إزاي؟ وبنفيد غيرنا بإيه؟ لأن الوعي مش رفاهية… الوعي حياة. والإنسان لما يختار يواجه الحقيقة بدل ما يهرب منها، ساعتها بس بيبدأ الوعي الحقيقي والمسؤولية والتغير الجزري.
