ومازالت الاكتشافات الفرعونية تذهل العقول

متابعة محمد سليمان

عندما تتابع احداث المدينة الفرعونية المكتشفة حديثا بالاقصر فأنت امام شواهد خيالية

هذا وقد كشف لوكالة انباء آسيا

الاستاذ امجد رشدى عن هذا الحدث فقال عبر منصة زوم وفى احدى الامسيات الثقافية بعنوان (مصر صانعة التاريخ) ل غرفة 19 وباستضافة الاديبة اللبنانية إخلاص فرنسيس.

الايام الماضية اعلنت مصر  تفاصيل مدينة كاملة كانت مفقودة تحت الرمال في الأقصر
المدينة المفقودة او مدينة “تحن آتون” بمعنى (اشراقة آتون)
تأسست المدينة في عهد الملك امنحوتب الثالث ابو اخناتون و جد توت عنخ امون ، الجميل فالمدنية انها مختلفة عن اي اثر فرعوني يعني احنا اغلب اللي وصل لينا من المصريين القدماء كانت المعابد العملاقة ومقابر الملوك والامراء الفخمة والاهرامات والمبانى الضخمة اللي اتبنت بالأحجار الصخرية انما بيوتهم اللي كانوا عايشين فيها واللي كانوا بيبنوها من الطوب اللبن مقدرتش تصمد مع الزمن وتلاشت
فالكشف ده يعتبر من اعظم الاكتشافات لعهد المصريين القدماء عشان لقينا اخيرًا اشكال واضحة لبيوتهم وشوارعهم كمان ، البيوت اللي تم اكتشافها جدرانها ارتفاعها ٣ متر وفي حالة ممتازة وشبه مكتملة
اللي حصل فالمدينة ان بعد ما حكم امنحوتب الرابع او اخناتون بدأ يكون فيه بينه وبين كهنه امون عداء شديد لانه كان بيعبد آتون وبيدعوا جموع المصريين لعبادته وعشان يكون بعيد عن بطش رجال الدين وكهنه امون قام جمع كل عمال واهالي مدينة تحن اتون وسابوا كل حاجة وراهم وهربوا من الأقصر الى المنيا في الشمال وبدأوا يبنوا عاصمة جديدة في تل العمارنة “اخت آتون” او زي ماهي معروفة اليوم باسم اخيتاتون
الغرف في منازل المدينة لقيناها مليانه بالادوات اليومية اللي كان بيستخدمها المصري القديم منها اواني حفظ النبيذ وطعام محفوظ زي الأسماك و اكسسوارات وغيرها وكأنهم لسه سايبين المدينة امبارح مش من ٣٥٠٠ سنة
لقينا خواتم وجعارين واواني فخارية ومن الواضح ان المدينة كان فيها ٣ قصور للملك امنحتب التالت
حتى الان اكتشفنا ان المدينة كانت متخططة و متقسمة الي ٣ أحياء ، المنطقة الاولى هي المنطقة الخدمية و دي لقينا فيها حتى الان مخبز المدينة والأفران بتاعته ومنطقة الطهي اللي كانت بتمد المدينة بالطعام والخبز
المنطقة التانية كانت الحي الاداري والسكني ودي لقينا فيها الوحدات السكنية المخططة ومحاوطه بسور جداري متعرج والسور ده فيه بوابة دخول واحدة بتدخلك علي الشارع الرئيسي و الطرق والمنازل يعني حاجة اشبه بكمبوند
اما المنطقة التالتة دي المنطقة الصناعية لقينا فيها مصنع انتاج الطوب اللبن اللي كان بيستخدم في بناء المنازل والقصور والطوب كان بيتم ختمه بشعار (نبت ماعت رع) وده اسم الملك امنحوتب الثالث وكمان مصانع لانتاج الخزف والتمائم المستخدمة في المعابد و مصنع غزل ونسيج ومصنع للمنتجات الزجاجية والمعدنية والاكسسوارات ومصنع لعب اطفال ومصنع للأحذية والنعول ومصنع صنارات لصيد الاسماك ومخزن لتجفيف وتخزين اللحوم
كمان تم اكتشاف دفنتين لبقرة و ثور مش معلوم تحديدا ليه مدفونين بالشكل ده وجاري تحديد السبب ، بخلاف اناء فيه لحم مسلوق يزن حوالي ١٠ كجم لحم ومكتوب علي الاناء (لحوم مسلوقة لعيد حب سد الثالث ، مقدمة من جزارة “خع” التي صنعها الجزار “ايوي” ) عرفنا من الاناء ده اسم شخصين من سكان المدينة ، الجزار (ايوي) واللي كان شغال في جزارة الحاج (خع) واولاده
عيد ال (حب سد) ده عيد مصري قديم كان بيحتفل بيه كل حاكم مصري بيزيد فترة حكمه عن ٣٠ سنة ، يعني بعد ٣٠ سنة بينزل الملك يحتفل بعيد الحب سد بأنه يظهر قوته البدنية والجسمانية قصاد جموع من الشعب عشان يثبت انه لسه جدير بحكم البلاد ، ف مكتوب على الفخار انه عيد (حب سد الثالث) لان الملك امنحوتب احتفل بالعيد ده ٣ مرات ، اول مره بعد ٣٠ سنة من حكمه ، المرة التانية بعد ما أتم ٣٤ سنة ، المرة التالتة بعد ما أتم ٣٧ سنة
الكشف ده صنفته (بيتسي بريان) عالمة المصريات الامريكية انه تاني اعظم اكتشاف فرعوني في التاريخ بعد اكتشاف مقبرة الملك توت عنخ امون
كشف فريد من نوعه ملقيناش ابدًا مدينة سكنية صناعية ادارية بهذا الحجم في تاريخ مصر القديمة
اكتشفنا المدينة دي من ٧ شهور فقط وحتى الان لم يتم الكشف سوى عن ربع المدينة ولسه البعثة شغالة وكل يوم يلاقوا امتداد جديد للمدينة

متابعة محمد سليمان مدير تحرير وكالة أنباء آسيا بايطاليا