حكمت المحكمة بقلم صابر قدح
حكمت المحكمة
صابرقدح
مين اللى قال إن مصر فقيرة
ودايرة تشحت على كل حصيرة
اتقلبوا عليها حرامية ياما
بيعوها الهدوم وقصقصوالضفيرة
ولسة
والله بقت موضةركوب الموجة
يهدا مع الهادى ويهيج مع الهوجة
يشيل سبحة وينقط في كباريه
مهم مصلحته مع البلد أومع الخوجة
ولسة
ياخاربين بيوت الناس الغلابة
ولابسين مسوح الطيابة والمهابة
مصر. ماتستاهلش كل دا منكم
عاملين حِملان وانتم ديابة
ولسة
مهما تدارى وتسهوك وتعمل عبيط
وعلى كل الحبال ماتشبعش تنطيط
كرشك مليان تاريخ وجغرافيا
مافيش فى الدنيا أسرار ياحويط
ولسة
كويس والله يابلدنا انك لسة عايشة
كل طوبة فى أراضيك طلعت بايشة
مين فيك ماعاناش من نهب خيرك
هما مش محصنين. وأصلابهم هايشة
ولسة
وأخرتها إيه بعد كل دا طمع
كروش مَلْو الشوف والسمع
يخرب بيت البحر وحبه لزيادة
المحيط من كرشكم جاله صرع
ولسة
ياصاحب اللقمة الناشفة والحاف
وبتنام فى عز البرد بَلا لحاف
حيتان بلدنا كتّر الله خيرهم
يوم الحشر شايلنها واوعى تخاف
ولسة
ياللى بتنام من غيرقلق على الأحوال
ضاربها سارمةومش فارقة الاموال
واخدهاوسيلة والحرامى واخدها غاية
كفاية عليك يافقير راحة البال
ولسة
ياسارقين من بلدنا المراتب
وشافطين المعاش والراتب
ننام ازاى وانتو بتبيعوا ف بلدنا
لولينا تمن كنتو بعتوناف زكايب
ولسة
ياولاد الكلب ياللى نهبتو البلد
شردتو الصبايا وجوعتو الكبد
تبيعوا أثار اجدادنا بايه وليه
هوفى ولد من غير أب بيتولد
ولسة
حكمت المحكمة قفلوا الدفاتر
وقع الحجر اللى كان داير
هاتروح فين من قوت الغلابة
لابد عن رجوعه مهما سافر
صابر قدح
2021/7/4
