اول الثانويه الازهريه محمد المرزوقي قرائه القرآن سبب نجاحي

اول الثانويه الازهريه محمد المرزوقي

قرائه القرآن سبب نجاحي

كتبت : دعاء حامد

طعم النجاح يستاهل كل التعب”، هكذا بدأ محمد تامر المرزوقي، ابن مدينة طلخا بمحافظة الدقهلية، والحاصل على المركز الأول في الثانوية الأزهرية، بنسبة 100%، القسم العلمي، حديثه، قائلًا: إن النجاح والحصول على ترتيب عال شيء مفرح ويستحق التعب، والفرحة تستحق التعب.

وأضاف محمد تامر: “أي حد ليه حلم لازم يستعين بربنا، ويكفي إن قراءة القرآن، كانت أكثر الأسباب المؤثرة عندي، وأنا حفظت القرآن الكريم كاملًا قبل أن ألتحق بالصف الأول الإعدادي”.

واستطرد: “مكالمة شيخ الأزهر مختلفة تماما، وغير ما كنت تتوقع، حتى لو كنت متوقعها، الفرحة مختلفة وأحلى بكتير، لما جات لساني وقف ولم أتمكن من استكمال المكالمة، وضربات قلبي كانت سريعة جدًا، وأعطيت التليفون لوالدي ودخلت غرفتي حتى أستجمع نفسي”.

محمد المرزوقي

وعن المذاكرة قال: “طول الوقت مذاكرة، كنت بصحى بدري بقدر الإمكان، وكل وقتي كان مذاكرة، اللعب بييجي وقت ما أتعب من المذاكرة خالص، وأنا مكنتش بعرف أقعد فترة كبيرة على الكتاب، أقعد ساعة وبعدها أفصل بأي حاجة”.

وأوضح أن الأسرة كانت توفر له كل ما يحتاج، سواء في الدروس، أو غيره، “كانوا مديني كل راحة، لما أقول عاوز أصحى الساعة كذا، كانوا يسهروا علشان يصحوني، وأنا بهدي نجاحي ليهم”.

وتابع: “من أول ما أعلنوا عن الجدول كانت أصعب فترة، وفترة المراجعة، كنت في كل دروسي باخد مع طلبة التربية والتعليم، وكان امتحاني متقدم عنهم 20 يوما، وطبعا المدرسين زودوا حصص إضافية، كانت فترة تقيلة وكثيفة، كل الوقت مذاكرة والنوم قليل، ودايما كان فيه إرهاق واكتئاب والحمد لله عدت على خير”