بعد الإنجاز اللي حققته البعثة المصرية الأولمبية المشاركة في أولمبياد طوكيو 2020 كتب عبد الرحمن بحراوي وحصد 6 ميداليات -(ذهبية، فضية، و4 برونزية)- كان فيه فخر بأبطالنا اللي رفعوا راسنا واسم بلدنا في الحدث الرياضي العالمي الأبرز.. فخر كانوا كلهم يستحقوه، ويستحقوا برضه تكريم الرئيس ليهم خصوصاً بعد المجهود اللي عملوه وكان ختامه عظيم.. اللي مفيش فيه شك إن كل إنجاز بيبقى وراه جنود مجهولين ساهموا هما كمان بمجهود كبير في الإنجاز ده وجايز كتير من الناس ماكانوش يعرفوا عن تفاصيله حاجة.. من أهم الجنود المصريين المساهمين مع أبطالنا في ميداليات طوكيو 2020 الشاب اللي موجود في الصورة ده.. الدكتور “مصطفى حسن إسماعيل”.. “مصطفى” هو المسؤول عن برامج التغذية الخاصة بلاعبة الكاراتيه “فريال أشرف” المتوجة بذهبية، ولاعبة الكاراتيه “جيانا فاروق” المتوجة ببرونزية، ولاعب المصارعة “محمد إبراهيم كيشو” المتوج ببرونزية.. 3 أبطال مصريين كان لـ “مصطفى” دور مش بسيط في اللي حققوه.. “مصطفى” خريج كلية صيدلة جامعة القاهرة وعنده 27 سنة ويعتبر أصغر طبيب تغذية شارك في أولمبياد طوكيو وده يوضح قد إيه إننا بنتكلم عن شخص مخلص وموهوب في التخصص بتاعه عشان يبقى مسؤول عن جزئية مهمة زى دي.. هو بيحب الرياضة عموماً، ولما جت فرصة عمله في مجال التغذية الرياضية بقت نقطة تحول في حياته إن بقى فيه ربط بين شغله وحاجة بيحبها فبقى فيه راحة نفسية وشغف دائم إنه يبدع في تخصصه.. التغذية السليمة ليها دور بارز في تطوير أداء أى رياضي.. من مهام “مصطفى” مع الأبطال الرياضيين المحافظة على النسبة السليمة للدهون والعضلات لكل لاعب بالشكل اللي يضمن له عدم الاستبعاد من المشاركة في المنافسات الخاصة بوزنه.. كمان دوره إنه يمنع ويتعامل مع أى أعراض أو لا قدر الله مشاكل صحية تحصل أثناء التمارين أو المباريات زى الدوخة أو الطاقة اللي بيتم فقدها أثناء اللعب.. بيقول “مصطفى” في حواره مع الصحفي “محمد خاطر” إنه بيحلم بتغيير وتطوير ثقافة التغذية الرياضية على مدار 5 سنين في الوسط الرياضي المصري.. عظيم إنك تكون جزء مهم من إنجاز رياضي مبهر التاريخ كتبه باسم بلدك.. كل التحية والفخر بـ “مصطفى” وبكل أبطالنا اللي كانوا عنصر أساسي في النجاح