الحدود الصحية في العلاقات الاجتماعية
الحدود الصحية في العلاقات الاجتماعية .
بقلم د/شيماء سمير.
استشاري الصحة النفسية والإرشاد الأسري والعلاقات الزوجية .
ناس كتير بتفتكر إن لما الإنسان يحط حدود مع غيره يبقى كده بيبعدهم عنه أو بيكون أناني
لكن الحقيقة إن الحدود الصحية مهمة جدًا في أي علاقة ناجحة ومريحة.
هي مش بتخلي الناس تبعد بالعكس بتوضح لكل واحد إيه اللي يريحك في التعامل وبتخلي فيه احترام بينكم.
الحدود الصحية معناها إنك تعرف إيه اللي تقبله وإيه اللي ما تقبلوش وتقدر تقول ده بشكل واضح ومحترم من غير خوف أو إحساس بالذنب.
الهدف منها مش إنك ترفض الناس لكن إنك تحافظ على راحتك النفسية وكرامتك.
لما مايبقاش فيه حدود الشخص ممكن يلاقي نفسه بيوافق على حاجات مش عايزها وبيشيل مسؤوليات مش مسؤوليته ودايمًا حاسس إنه لازم يرضي الكل على حساب نفسه.
ومع الوقت ده بيعمل توتر وإرهاق وضغط نفسي وممكن يخليه يضايق من العلاقات اللي كان بيحبها.
أما لما تكون الحدود موجودة فده بيديك إحساس بالراحة والأمان وبيخلي علاقاتك أوضح وأسهل.
والناس اللي بتحبك بجد هتفهم احتياجاتك وتحترمها حتى لو اختلفت معاك أحيانًا.
٠٠لازم تتعلم تقول “لا” لما حاجة ما تناسبكش من غير زعل أو اعتذار زيادة.
٠٠إنك ما تسمحش لحد يهينك أو يقلل منك.
٠٠إنك تحترم خصوصيتك وخصوصية غيرك.
٠٠إنك ما تشيلش مشاكل الناس كأنه مسؤوليتك أنت.
٠٠إنك تدي لنفسك وقت من غير ما تحس بالذنب.
٠٠واتعلم تقول اللي محتاجه بشكل واضح.
٠٠اتكلم بهدوء واحترام من غير هجوم أو كلام كتير زيادة.
٠٠خليك ثابت على حدودك لأن التراجع كل مرة بيخلي الناس ما تحترمش كلامك.
٠٠احترم حدود غيرك زي ما بتحب غيرك يحترم حدودك.
في النهاية، افتكر إن الحدود الصحية ما بتقللش الحب ولا الاهتمام لكنها بتخلي العلاقات أنضج وأثبت. فالعلاقة اللي فيها احترام متبادل بتدي الطرفين مساحة آمنة يعيشوا فيها براحتهم لكن العلاقة اللي مافيهاش حدود غالبًا بتتحول لضغط واستنزاف.
