الكنز المفقود في رحلة الحياة!!

الكنز المفقود في رحلة الحياة

كل واحد فينا ماشي في رحلة طويلة اسمها الحياة ودايمًا بيدور على كنز يفتكر إنه هيحقق له السعادة والراحة في ناس شايفة الكنز في الفلوس وفي ناس بتشوفه في المنصب أو الشهرة أو امتلاك كل اللي نفسها فيه لكن مع مرور الوقت بيكتشف الإنسان إن كل الحاجات دي مهما كانت كبيرة عمرها ما هتقدر تملأ القلب ولا تمنح راحة تدوم

الكنز الحقيقي مش بعيد عننا ولا مستخبي في مكان صعب الوصول ليه الكنز الحقيقي موجود جوانا في الرضا والقناعة وفي الأخلاق الطيبة وفي الناس اللي بتحبنا بصدق وفي قدرتنا إننا نفرح بالحاجات البسيطة اللي بنعيشها كل يوم لأن السعادة مش مرتبطة بكام حاجة بنملكها لكنها مرتبطة بإزاي بنشوف الحياة

الحياة مع كل يوم بتعلمنا دروس جديدة وبتأكد لنا إن الوقت هو أغلى حاجة ممكن يمتلكها الإنسان وإن الصحة نعمة كبيرة محدش بيحس بقيمتها غير لما يفقدها وإن وجود الأسرة والأصحاب الأوفياء حوالينا هو أكبر ثروة ممكن نحصل عليها ومع مرور السنين بنكتشف إن أجمل الذكريات كانت في لحظات بسيطة عشناها مع الناس اللي بنحبهم مش في الحاجات اللي اشتريناها

ويمكن الكنز اللي ناس كتير بتفضل تدور عليه طول عمرها هو إنها تعرف نفسها كويس وتعيش بالمبادئ اللي مؤمنة بيها وتسيب أثر حلو في حياة كل شخص قابلته لأن الكلمة الطيبة والموقف الجدع والعمل الصالح ممكن يكونوا أغلى من أي كنز في الدنيا

وفي آخر الرحلة بنفهم إن الحياة مش سباق على الفلوس ولا المناصب ولا الشهرة لكنها فرصة نعيشها بمعنى ونستمتع بكل لحظة فيها ونحب الناس ونساعدهم ونرضى باللي قسمه ربنا لنا لأن اللي وصل للسلام النفسي وعاش بقلب راضي وترك ذكرى جميلة في قلوب الناس هو ده الإنسان اللي لقى الكنز الحقيقي اللي ناس كتير فضلت تدور عليه طول عمرها

بقلم م/ عمرو شرف