بقلم الكاتب أحمد شادي .. الخيوط الموصولة

اي علاقة في الدنيا بيبقا فيها خيوط كتيرة رابطة طرفي العلاقة ببعض كل ما الخيوط دي بتبقا كتيرة كل مالعلاقة دي بتبقا قوية و كل ما الخيوط بتقل كل ما بتبقا العلاقة اضعف .. طيب هل الخيوط دي احنا الي بنوصلها ؟

في خيوط بتبقا موجودة رباني احنا مش بنتعب فيها و دى بتكون اجمل خيوط و دي الي بتولد الحب الي كلنا بندور عليه و في خيوط احنا بنشبكها و بنربطها عشان نبني علاقة سوية و سليمة و صحية زي اننا نبني حبل الاحترام و حبل الاهتمام .

الخيوط الموصولة بين الطرفين دي بتبقا عاملة زي لعبة التليفون الي كنا بنعملها زمان كنا بنجيب كوبايتين و نربط بينهم حبل و عشان نقدر نتواصل كل واحد فينا كان بيشد الحبل و لما ما بنحبش نتواصل كنا بنرخي الحبل طيب هل معقولة ان في طرف واحد هو الي يفضل يشد الحبل عشان يتواصل ؟ هو معقول لكن تخيل معايا هو كدا هيشد الحبل و كمان هيشد ايد و انتباه الطرف التاني فدا مجهود بدني مضاعف طيب تعالي بقا للجانب النفسي و هو الجزأ الاصعب في اي علاقة لان الارهاق النفسي بيتبعه ارهاق بدني و لكن ليس بالتبيعة الارهاق البدني يتبعه ارهاق نفسي .

احنا محتاجين حد لما نرخي حبالنا و ايدينا يشدنا باهتمام و لهفة و لما هو رخي ايديه نشده بلهفة و نحضنه بشوق محتاج لما اتوه في صحرا و انادي بصوت عالي الاقي حد يرد عليه و يحسسني بالامان لكن احساس صعب جدا انك وانت تايه تنادي فتسمع صدي صوتك تخيل بقا انك و انت تايه تلاقي حد هو الي ينادي عليك شعور جميل .

لما الحياة تاخدني منك اغمزني بحبل وصالك رجعني لحضنك ما تسبش الحبل و ترخي ايديك و تخاف علي روحك من جرح رسمه خيالك و من امتي حبل الوصل بيجرح .ينفع يبقا في تبادل مشاعر بينك و بين عروسة المريونيت طبعا لا لكن ينفع انت يبقا عندك مشاعر اتجاهه المريونيت لكن هي مش هتبادلك المشاعر دي ابدا .

كذلك هم انقياء النفوس تبقا مشاعرهم وحبهم موصول ولو تقطعت كل الحبال .