راجل_وست بقلم هناء زغلول
راجل_وست
بقلم هناء زغلول
حاولت افكر بطريقة مختلفة، وأحط نفسي مكان الراجل عشان اوصل لاجابة لاسئلة معظم الستات
وهي ليه الراجل مش حنين
ليه مش بيهتم وليه … وليه .. وليه….
طب اولا كده هنفكر بطريقتهم
راجل راجع من الشغل مش عارف انتي بتفكري في ايه طول اليوم، ولا رد الفعل اللي انتي متوقعاه منه،
هو داخل لا بيه ولا عليه عايز يرتاح من الضغوط اللي عليه طول اليوم
ومنتظر لحظة الهدوء اللي هيقعد فيها مع نفسه …
وطبعا انتي مستنيه أنه يكلمك ويسالك عامله ايه ويخفف عنك ضغط البيت والأولاد …
من هنا بتيجي المشاكل كل واحد منتظر التاني يخفف عنه وكل واحد شايف أنه مش واخد حقه والطرف التاني مش حاسس بيه ..
ولما بيدخل العند والانانية في الموضوع، الصراع بيزيد والفجوة ما بين الزوجين بتكبر …
محدش بيحاول يحط نفسه مكان التاني ..
محدش عايز يتنازل عن طلباته واحتياجاته في سبيل راحة الطرف التاني
لو كل واحد فينا قدر ظروف اللي قدامه و التمس له العذر بجد الحياة هتختلف وكتير من مشاكلنا هتتحل
بس يكون الرضا بالمقسوم موجود جوانا ودايما نفتكر نعم ربنا علينا وما نفكرش في اللي ناقصنا…
وللحديث بقيه
ربنا يسعد قلوبنا جميعا ويراضينا ويرضي عنا
