حوار مع دكتور/ مدحت عامر

الاعلاميه/ إيمان أحمد الوصيف

اليوم ينعقد المؤتمر الحادي والثلاثين للجمعية المصرية للخصوبة والعقم، وعلى ما يتناوله المؤتمر تم لقاؤنا مع الدكتور مدحت عامر استاذ ورئيس قسم أمراض الذكورة بمستشفى آدم الدولي ورئيس قسم الذكورة بكلية الطب القصر العيني سابقًا.. حاصل على دكتوراة أمراض الذكورة.

… والذي بدوره حدثنا عن دور الذكاء الإصطناعي في تشخيص وعلاج حالات ضعف أو ندرة الحيوانات المنوية.. والتي تعرقل الإنجاب، وبسؤاله عن الوسائل الحديثة للحقن المجهري:

_الوسائل الحديثة للحقن المجهري تعتمد على اختيار أفضل الحيوانات المنوية علشان نحسن مردود الحيوان المنوي من ناحية المشاكل الذكورية فأصبح ده من وسائل فلترة الحيوان المنوي وانتقائها أفضل بكتير من الوسائل التقليدية اللي كنا بنستخدمها مسبقًا. وأصبح الذكاء الإصطناعي بيساعدنا في اكتشاف حيوانات منوية نادرة عند فتح الخصية لدى الرجال عديمي النطاف.

وكمان الجراحة المايكروسكوبية بتتقدم يوم عن يوم والأجهزة بتتحسن وبتتطور كل يوم والحضانة الذكية النهاردة إضافة لطيفة، وبنستخدم مواد أكثر كفائة، وبالتالي تجميد الأجنة وتجميد الحيوان المنوي وتجميد البويضات كمان بقى أفضل من قبل كده.

*تمام.. وبالنسبة لنسب النجاح اختلفت مؤخرًا عن قبل كده؟
_نسب النجاح بتزيد بشكل ملحوظ بالذات بعد ما دخلنا كمان الفحص الكروموسومي للأجنة قبل إرجاعها، لأن بقينا قادرين نرجع الأجنة اللي نسبة الحمل فيها أعلى، لنقائها الكروموسومي ودي كمان طفرة زيادة بتساعد في الحالات الصعبة والحالات اللي فشلت قبل كده.

*ممكن نعرف إيه هي وسائل التشخيص بالنسبة للحمل المجهري؟
_اساسًا هو تحليل السائل المنوي بالنسبة للزوج، بالنسبة للزوجة بيبقى كشف وسونار وتحاليل هرمونات، وبناء عليه بنحط الخطة العلاجية سواء هنشتغل بالسائل المنوي طازة أو مجمد أو هناخد من الخصية ولا لا، فالخريطة العلاجية بتتحط بناء على الفحوص الأولية اللي هنعملها في عيادة الذكورة وعيادة النسا.

*ممكن سؤال أخير هنختم بيه.. ندرة الحيوانات المنوية الشديدة ليها علاج غير الحقن المجهري؟
_بعض الحالات بيكون لها علاج، لكن معظم الحالات ملهاش ويبقى الحقن المجهري هو الحل، ودايمًا الحالات دي بنحاول نحتفظ بالحيوانات المنوية مجمدة قبل ما نبتدي تجهيز الزوجة، على أساس لو يوم الحقن الزوج معرفش يطلع حيوانات أو كانت لا تصلح يبقى معانا عينة مجمدة بدل ما نضطر لفتح الخصية ونعمله عملية جراحية.

شكرًا لحضرتك دكتور مدحت عامر.. تشرفت باللقاء مع حضرتك ونتمنى لك التوفيق يارب.