هل احنا ماشيين صح ولا غلط

بقلم الدكتورة  نورا الشناوى 

في العام ٢٠٢٢ امريكا اتضربت بأعلى نسبة تضخم من أربعين سنة، الاسعار اصبحت مرتفعة جدا و المستثمرين بيقترضوا بغباء و ده بيزود التضخم اكتر

البنك المركزي الامريكي عايز يقلل خروج الدولارات من البنك، قام رافع الفايدة، عشان يصعب الاقتراض، ويشجع الادخار لما يزود الفايدة، الناس هاتبطل تستلف

وتبدأ تحط فلوس فى البنك وهوا المطلوب اثباته

و لما الفايدة زادت في امريكا حصل ايهل

البورصة وقعت فى مصر، عشان الاجانب اللي كانوا بيستثمروا دولاراتهم لقوا انه الاسهل لهم انهم يدخروها في البنك ف امريكا و هاياخدوا فايدة مضاعفة. و دي اللي اسمها مشكلة هروب الاموال الساخنة.

طيب لما اتسحب الدولار من السوق قل العرض و زاد الطلب يبقى ايه النتيجة الحتمية تمن الدولار زاد

 استوعبت

دلوقتي عندك أزمة مفيش دولارات ها تتصرف ازاي؟ 

هما خطوتين

١- تجيب دولارات

٢- تقلل انفاق الدولارات

س – نجيب دولار منين؟ او تحديدا ونجيب دولار ازاي من غير ما نستلفه؟ 

 ج- ندخلهم البلد استثمارات مش ديون

بكدا تصحى الصبح تلاقي ١٢ مليار دولار دخلوا الخزنة من تلات دول عربية، بدون زيادة الديون، كاستثمارات في شركات مصرية. و كده زودت العرض من الدولار من غير ماتزود ديونك، رغم اننا بالتأكيد سنلجأ للاقتراض لكن ماعملناهوش كأول حل و جربنا حلول جديدة.

– فاضل ايه تاني؟

 اننا مانضعيش الدولارات اللي جيبناها بقى، مانسحبش من الخزنة دولارات تاني.

طب الدولار بيتسحب يروح فين؟ هاتلاقيه بيتصرف في الاستيراد، طيب نمنع خروج الدولار ازاي؟

١- تحط قيود على الاستيراد، زي اشتراط خطاب الضمان، عشان نقلل الاستيراد

 وانفاق الدولار

٢- تمنع استيراد المنتجات اللي ليها بدائل مصرية، زي ماحصل النهاردة

٣- تطالب شركات الملاحة المصرية انها تدفع لخطوط الملاحة الاجنبية بالجنيه مش بالدولار زي ما هايحصل قريب ولسه هايكون في خطوة رابعة و خامسة

وكل خطوة ممكن تقلل انفاق الدولار هاتتعمل.

 حلو زودنا المعروض من الدولار و قللنا انفاقه نعمل ايه تاني؟ل

لسه عندك خطوة تالتة انك تحقق اكتفاء ذاتي من المحاصيل الاستراتيجية عشان ماتلاقيش تاجر بيصدر و يكسب دولار فيسبب ازمة غذاء

فتصحى تلاقي قرار منع تصدير ل ٨ سلع اساسية لمدة ٣ اشهر لحد مانشوف الدنيا هايحصل فيها ايه.

طيب هل انت عندك اكتفاء ذاتي من السلع الاساسية عشان تفرد صدرك

وتمنع الاستيراد؟

الإجابة ايوة عندى اكتفاء ذاتي من الخضر و الفاكهة والاسماك و الدواجن و مايتبعها من منتجات البيض و الالبان و للامانة هو اكتفاء يتراوح بين ٨٠-١٠٠٪؜ لكن تقدر تقول انا هاقفل على نفسي و مش هاستورد الا الضروريات و مش هاصدر الضروريات كمان عشان مايحصلش ازمة غذاء.

طب هوا مين قال ان ممكن يحصل ازمة غذاء اساسا 

في الاسبوع التالت من مارس ٢٠٢٢ طلع ماكرون و قال ان الحرب الدايرة بين روسيا و اوكرانيا ستتسبب في ازمة غذائية في الشرق الاوسط و افريقيا خلال ١٢-١٨ شهر و ذكر بالتحديد مصر لانها بتستورد ٨٠٪؜ من احتياجاتها من روسيا و اوكرانيا.. اللي قفلوا الحنفية عن العالم.

وبكده تقدر تفهم ليه مصر بتوفر كل دولار ممكن، عشان نشتري بيه قمح

عشان ناكل عيش حضرتك

 على صعيد الاستيرادد لقينا وزير المالية الفرنسي واقف في القاهرة بعدها بإسبوع بيقول “نتعهد بتوفير احتياجات القمح لمصر خلال الاشهر القادمة ليس فقط فرنسا، لكن قامت مصر بتغيير اولويات استيرادها تماما من روسيا و اوكرانيا الى امريكا و كندا و الهند و الارجنتين.

 وعلى الصعيد المحلي قامت مصر بالتعجيل بموسم شراء القمح من المزارعين و زيادة سعر الشراء لتشجيع المزارعين على زيادة الانتاج.

 احيانا النجاح مش بيكون انتصار صارخ لكن النجاح بيكون نجاتك من أزمة كبرى و مرورك منها بأقل خسائر ممكنة الكوكب كله عنده أزمة ف حاجتين، الدولار و القمح

 وانا اتصرفت فى دولارات و اتصرفت فى القمح. في وقت أن البلد اللي عندها ورقة بدولار او سنبلة قمح بتقفل عليها.

العالم مقلوب عشان امريكا رفعت سعر الفايدة من ٠.٢٥٪؜ الى ٠.٥٠٪؜، وتعتزم تكرار الكارثة دي عدة مرات لحد ماتوصل لنسبة فايدة ١.٩٪؜ بتهاية العام، فا انت لو مااخدتش كل احتياطاتك النهاردة كان ممكن هاتفلس خلال ١٢ شهر زي ما ماكرون قال. 

 انا حبيت اشارك فهمي المحدود للموقف و اقول اني اتفهم الاجراءات الاقتصادية اللي بتحصل في مصر من بداية الأزمة

 وشايفاها منطقية جدا وملهاش بديل تاني

 بس انا هااقول ان الاجراءات المصرية صحيحة تماما والدليل على نجاح الخطة

وهو انك عندك عيش على الترابيزة النهاردة.