دائما فكر فى اللى جاى وانسى اللى فات “بقلم:ايمان العدوى

التفكير الزايد بيهد حيل صاحبه وبيحرمه من السعادة , تخيل ترهق عقلك يوميًا بالتفكير في اللي فات واللي جاي واللي نفسك ييجي ومبيجيش ,

الموضوع صعب وبيعمل حمل كبير جدًا على روحك , وأكتر حاجة ممكن تأذي هي التفكير الكتير ,

عمرك كله عباره عن ٣ أيام

يوم عدى ومش هتقدر تغيره أو ترجعه ‘ لكن لازم تتعلم منه ,

ويوم انت عايشه ومش حاسس بيه وهيعدى وترجع تندم عليه ,

ويوم جاى انت متعرفش هييجى فعلاً ولا لأ ومش بايدك غير انك تخطط له وبس ,

أى حاجة فاتت عليها ساعة بقت ماضي ‘

متجلدش نفسك وتأنبها على تصرف انت خدته بوعى وظروف مختلفة عن دلوقتي ‘ ومتسحلش نفسك فى بكره ‘ اللى مش بايدك أصلاً

علشان كده دايمًا قول : اللهم أسألك بالًا مطمئنًا شاكرًا لما قسمته لي

ولما تلاقى نفسك دماغك سحلتك فى التفكير الزايد ردد الذكر ده فوراً ( لا حول ولا قوة إلا بالله ولا معطى ولا مانع إلا الله) علشان عقلك يهدى شويه عليك

وعلى فكرة التفكير الزايد بيقلل المناعة لأنه بيزود التوتر وبيعلى الكورتيزول وبيقلل النوم فـَدايماً هتلاقى عندك صداع ومعندكش طاقة تعمل أى حاجة

هى مش سهله بس مستاهله انك على الأقل تحاول