صانع المحتوى خالد محمود: التريند بقى شغل.. ومسلسل جعفر العمدة طلع مواهب تمثيل محدش كان بيسمع عنها
وليدمحمد
كشف صانع المحتوى خالد محمود، تفاصيل بدايته وكيفية دخوله عالم السوشيال ميديا، موضحًا أنه بدأ في دراسة المسرح منذ أن كان طالب بالثانوية.
وقال خالد محمود، في لقائه في برنامج “من غير نفسنة” الذي تقدمه الفنانة انتصار وبدرية طلبة، ونوليا، عبر شاشة قناة “هي” صانع المحتوى خالد محمود: أنا بدأت مسرح من وأنا في ثانوي، واتعلمت إزاي أعمل الشخصية كامل، وإزاي أعمل تريند مش إني أتكلم عادي، ما كل الناس بتتكلم، بس الفكرة إزاي إني أعمل فيديو أبقى عارف الناس عايزة تشوف إيه، دلوقتي في موجة الطلاق لما واحد يطلق مراته ويروح يشوف واحدة تانية وهي تروح تقفشه، وده كله علشان التريند.
وتابع: أنا طلعت في فترة قصيرة الحمد لله، وفنانيين مصر كلهم بيشوفوني لأني مبعملش حاجة مسفة، ولا حاجة تخجلي أنك تشاركيها، أنا دايمًا بقول حاجة وعندي وجهة نظر بصراحة، أن الإسفاف عمره ما بيكمل، والفكرة أن طول ما في موهبة هتبقى تريند.
وأضاف: التريند دلوقتي بقى شغل، يعني لما تعملي فيديو ويجبلك كام ألف دولار بقى شغل، والناس بقت بتتهافت على الفيسبوك واليوتيوب علشان الفلوس، ولكن في فئة بتعمل فيديوهات زيي أنا وأصحابي علشان عايزين نمثل أو نعمل برنامج، فبنقول دي خطوة أولى.
واستكمل: مسلسل جعفر العمدة طلع كمية مواهب تمثيل في الناس محدش كان بيسمع عنها، زي ما كانوا بيقلدوا الأستاذ محمد رمضان، والفنانة هالة صدقي.
من غير نفسنة” برنامج نسائي ساخر يقدمه كلا من الفنانة انتصار وبدرية طلبة ونوليا، يعرض يوميًا من السبت إلى الثلاثاء، ويقدم عددًا من القضايا الاجتماعية بطريقته الساخرة والخاصة من خلال استضافة عددًا من الشخصيات المؤثرة على السوشيال ميديا والمشاهير والفنانين لمعرفة آرائهم في تلك القضايا.
