سيد عادل يكتب: استقيموا يرحمكم الله
إنا لله وإنا اليه راجعون ..حزن شديد يسيطر على الوسط الرياضي وعلي كل المنتمين للانسانية
وللاسف الشديد يروج بعض الاعلاميين والمسئولين بأن ماحدث لأحمد رفعت مش بسبب الزعل والقهر ، وانه عنده مشكلة في القلب من زمان من وهو صغير أو عيب خلقي هو مولود بيه !!!
كلام غريب جدا لأن أحمد بدأ يلعب كورة من وهو عنده 10 سنين يعني لعب أكتر من 20 سنة متتالية من غير ما يحصله أي مشكلة
أحمد لعب لكل منتخبات مصر ناشئين وشباب ومنتخب أوليمبي ومنتخب أول وكل المنتخبات دي بتعمل فحوصات طبية للاعبين
أحمد لعب في 6 أندية مختلفة منهم 5 أندية في مصر وكلها أندية كبيرة زمالك واتحاد ومصري وإنبي وفيوتشر ، وكمان الوحدة الاماراتي وكل الاندية دي عملتله كشف طبي كامل قبل التوقيع وكان أخرهم الوحدة قبل وفاته بفترة قصيرة ولو عنده اي مشكلة في القلب مكانتش الاندية دي اتعاقدت معاه
أحمد لعب أكتر من 500 مباراة مع كل فرق الناشئين والشباب والفريق الأول ، ومنهم أكتر من 300 مباراة لعب فيهم أساسي وتقريبا أكتر من 200 مباراة لعبهم كاملين ، معقولة كل الماتشات دي كان كويس وزي الفل ومحصلوش اي حاجة وماحسش بأي حاجة ، وتاني ماتش تحديدا بعد الأزمة بتاعته حصله اللي حصل بعد 29 دقيقة لعب فقط والماتش اللي قبله لعب 17 دقيقة فقط !!
استقيموا يرحمكم الله
