شهقة_نَفَس الأم لولو

شهقة_نَفَس

الأم لولو

شهقة نَفَس

وجع الولادة في صرخته

بيهون

يكبر بحلمي وفرحتي

لما أشوفه يكون

ويمص من أيامي

شهدي وضحكتي

واهديه جمال الكون

يحبي

يدوس على دمعتي

أرعاه بقلب حنون

يفتح بيبان بكرة

ويرسم سكتي

ويحرك المكنون

شهقة نَفَس يكبر

ويرد على قولي

على حالي اتصبّر

وأقول ده مفعولي

يطول وأنا بانحني

حاساه سبق طولي

يا فرحتي اصبري

شهقة وهتنولي

ويسيب إيديا الولد

يمسك إيدين تانية

ويزفه قلبي أنا

بفرحة الدنيا

نفس الولد يجي

وروحي بتضمّه

لكن بقى في حضنها

ما أنا سته مش أمه

واسقيه حكاوي زمان

واعيش معاه حلمه

بقيت مجرد أمان

موصولة فيه رحِمه

شهقة أخيرة كمان

ويضيق عليا المكان

والعطف والإحسان

صورة لحضن زمان

كان ياما بيضمه

صورة بشريط من فوق

عشش عليها الشوق

باسها بشعور مخنوق

صورة أبوه وأمه

#الأم_لولو