دايرة الأم لولو

دايرة

الأم لولو

أنا برة الدايرة

وشوفت إزاي المنحنيات

والقُطر المتحكم فيها

والوتر الكاشف لجميع الزاويات

وتماس الدايرة في نقطة شوف

والضلع المنحني والمكشوف

والقلب النابض والملهوف

مطروح من نبضه كتير دقات

منفرجة الزاوية بتحضن فيك

180درجة بحبك

قرب للزاوية الله يخليك

احسب نبضاتها بشوق قلبك

لو سالب أو موجب هساويك

وهاضاعف أفراحي في قربك

أنا جوا الدايرة

قلب بريء

الدايرة عليا بقت بتضيق

البرجل خالف كل قياس

أنا تايهة يا ناس

وفي قلبي حريق

ماتبلش ورقي عشان شفاف

النقطة السودا بتظهر فيه

الهامش تنى في سطوره وخاف

وبيحضن قلبي عشان يحميه

مابقاش إحساس

محذوفة الفرحة من الحسابات

شوفت المقياس

وحاولت اوحّد في المقامات

الجذر خلاص

رافض يتفك

ومعاند لجميع الأدوات

بقى بين الدايرة ومركزها

أبعد مسافات

القلب مسح كل القوانين

واتبرّع بالروح والنبضات

#الأم_لولو