حين يبوح الجسد بأسراره

كتبتها : د/ ماهي احمد
تخيلي لو جسمك قرر يتكلم… هيقولك إيه؟
يمكن أول حاجة هيقولها: “أنا تعبت من إنك تسمعيني آخر واحد. بتسمعي صوت الكل وبتلبي طلباتهم، إلا صوتي”. جسمك مش بس وعاء بتعيشي فيه، هو مرآة لحالتك النفسية والعاطفية، وكل إشارة بيبعتهالك مش صدفة.
لما يوجعك راسك بدون سبب واضح، يمكن بيقولك “كفاية ضغط وأفكار زايدة”.
لما معدتك تتقل، يمكن بتنادي: “ما تخزنيش مشاعرك جوايا”.
لما تحسي بإرهاق حتى وإنتي نايمة كفاية، ده معناه: “أنا محتاج راحة أعمق من مجرد نوم… محتاج طمأنينة”.
الجسم بيتكلم بلغة الألم، الإرهاق، الحساسية، وحتى الأمراض اللي ساعات تيجي فجأة. هو مش عدوك، هو صديقك الأقرب اللي بيحاول يحميك من نفسك.
المطلوب إننا نتوقف لحظة ونسمع:
اسألي نفسك: “هو جسمي محتاج إيه دلوقتي؟ راحة، حركة، أكل صحي، ولا حضن أمان؟”
افتكري إن اللي بيظهر في الجسد غالبًا جذره في النفس: الغضب المكبوت يطلع في ضغط الدم، القلق في ضربات القلب، والحزن في ضيق التنفس.
كل مرة تسمعي وجعك، اعتبريه رسالة مش لعنة.
لو جسمك اتكلم معاك دلوقتي، يمكن يقولك:
“أنا مش عايز منك الكمال، أنا عايزك تحبيني، تهتمي بيا، وتسامحيني زي ما أنا سامحك”.
💡 سر القوة إنك تتعاملي مع جسمك كأقرب صديق… لأن صوت جسدك هو في الحقيقة صوت روحك.