انت ترى ما بداخلك

كتبت مارينا مدحت
التحرر مش كلمة بنقولها وخلاص، التحرر قرار. قرار إنك تبطل تعيش أسير لخوفك، أسير لترددك، وأسير للأفكار اللي كل يوم بتقنعك إنك مش قادر وإنك لازم تفضل واقف مكانك.

كتير مننا بيعيش سنين طويلة جوه سجن هو بنفسه بناه. سجن من الشك، ومن القلق، ومن الخوف من الفشل، ومن الخوف من كلام الناس. وكل يوم يعدي وهو مستني اللحظة المثالية، الفرصة المثالية، أو الشجاعة الكاملة. لكن الحقيقة إن اللحظة المثالية عمرها ما بتيجي، والشجاعة مش معناها إنك ما تخافش، الشجاعة إنك تتحرك رغم الخوف.

أصعب حاجة في الحياة إن الإنسان يفضل محبوس جوا دماغه. يقضي عمره كله بيفكر بدل ما يجرب، ويتخيل بدل ما يعيش، ويخاف بدل ما يتحرك. الأفكار لما تسيطر علينا بتتحول لقيود، والقيود دي مع الوقت بتسرق مننا فرص وأحلام ولحظات كان ممكن تغير حياتنا كلها.

لما الإنسان يتحرر، بيكتشف نسخة جديدة من نفسه. بيكتشف إنه أقوى مما كان متخيل، وإن معظم المخاوف اللي كانت بتعطله ما كانتش حقيقية بالشكل اللي رسمه في خياله. بيبدأ ياخد خطوات، ويمكن يقع، لكن على الأقل بيعيش. لأن الحياة مش للناس اللي واقفة تتفرج، الحياة للناس اللي بتجرب وتتعلم وتكمل.

محدش اتخلق علشان يعيش مقيد. كل واحد فينا جواهاه روح بتحب الحرية، بتحب الانطلاق، وبتحلم إنها توصل لأبعد مكان تقدر توصله. علشان كده متخليش خوفك يقودك، ومتخليش ترددك يقرر بدالك. افتح الباب ، وخد الخطوة اللي خايف منها، وصدق إن على الجانب الآخر من الخوف فيه حياة أوسع، وفرص أجمل، وسلام داخلي يستحق إنك تحارب علشانه.

تحرر… لأن الحياة قصيرة جدا على إنك تعيشها سجين أفكارك