شاهد عيان وسط الميدان شعر محمد المعداوي
شاهد عيان
شعر/ محمد المعداوي
شاهد عيان وسط الميدان
شايل سلاحى فى الكلام
موش لاقى غير حفنة حروف
وصوت بينده فى الادان
والكل رايح الميدان
ناس تهلل .. .ناس بتجرى
وناس بتتفرج
سياسى هاوى
فنان وغاوى
حب الظهور
كلة رايح الميدان
من غير قضية
الا الكلام
واللى شالوها بالتمام
شالوا القضية
واتعلقوا
فى ارميدان
فضلت انده بعلو صوتى
يا بلدى
موش انتى امى
ودمك هو دمى
سايبانى لية
من غير غطا
ينهشوا لحمى
يسرقوا اوتى
يهدموا بيتى
ردى يا امى طمنينى
و لا انت ناوية تعذبينى
ابنى حبيبى
من زمان وانا شايلة همك
سامعة كل المظلومين
المجروحين .. المقتولين
فى ميدان حزين
باعو البلد يا بنى فى ليلة
وسابوا جرحى للزمن
يداوية غريب
باعوا… ونسيوا
ان ابنى فى يوم هيصحا
ويعلا صوتة بالانين
باعوا البلد من غير تمن
وسابونا نحتاس فى الديون
ابنى حبيبى
بكرة جاى
والنيل هيروى ارضنا
نزرع ونحصد اكلنا
ونبنى بيت يلمنا
يجمعنا فيه كلنا
من غير ما حد يذلنا
يحكم وينهى فى امرنا
وعمرة ماكان مننا
يا بلدى
قولى للزمان
ان جواكى الامان
ورافعة راية السلام
لكل زوار الميدان
