محطة قطر✍🏻 اسلام حميدة
محطة قطر ✍🏻
طَريق ومَاشي بين قُطبين
زي طِير مايستغناش عن جناحين
وزي شعور لابد يكون بين اتنين
وبرفقة صَديق
صُحبه بتجمعنا بالعابرين لبعض الوَقت
بنسرق حكاوي الناس من عُيونهم
زي قِصه هناك ساكته في عيون بنت
أمِنت إرتباكها من نَظراتي واستأذنت
في خُيوط وصدفه بالناس بتجمعهم
ناس بتحب تتكلم وناس دموعهم بتمنعهم
أو شئ من هذا القبيل
والقليل منهم كتير ومابيتنسيش
شاب مقبل عالحياه عنيه بتتكلم جواه شعور
واحنا نفهم هدفها وكلام مابين السطور
خارج بكامل اناقته بيبتسم لبنت في مكان مش بعيد عنهاا
وهي السماعات ف ودانها مشدوده وسرحانه لأغنيه بتسمعهاا
يروح وييجي بيحاول يلفت نظرهاا وانا وصديقي بنراقب الموقف
محطه والقطر بيقف
يركب بياع الكُتب
يخطف اجواء المكان
شَواف وقاري زبُونه
كَارُه ولايق عليه لونه
والناس من خِفة دمُه بتسمعله
والبنت الشَارده بأفكارها ضحكتله
وصاحبنا الشاب بيستسلم
بينزل ف اول محطه
بيفتكر حاجات غاليه كانت ف حياته من فتره وبيفتكر ف حاجات ف اديه شاريه وواضحه واسهل
اكيد بيروح يقدرها وقد اي هي نعمه
حِكمه بتتفرض بعدين بندركهاا
في حاجات بنشوفها مالغريب بترجعناا
مش كُلنا بنشوف نفس الأشياء جَميله
ومش كُلنا بناخد القطر وسيله
قال البياع
مَعايا كتاب بيتكلم عنك
معاناتك وايه اللي حاصلك
بيتكلم عني ازاي
تعرفني منين يابياع
عامل مثقف وانت بتاع
زي الناي الناس بتجتمع علي حزنه
في حاجات عنكم كتابي بيعرفه
وزي مافضول البعض بيخطفه
ناس بتشتري وبتصدقه
بدافع من فضولهم
وكلهم ليهم اسبابهم
اللي شاري واللي مش شايف
شفايف عجوز بيتحرك وقت اللزوم
جبينه بيحكي كل شئ صامت جواه
باصص بس عالطريق
بيضحك بس للأطفال
ويرجع تاني شخص حزين
يوزع طاقه مسمومه علي البساتين
رايح فين الله اعلم
لكن عنيه بتقول
انه راجع من مشوار طويل
كل حاجه فيه بتوصفه
رسمه وصِفته
وفلانه بتحكي وكلامها عباره عن سخط
كل شئ حواليها شايفاه غلط
وان الدُنيا مش مُنصفه
مُرتبكه اديها متكتفه
قاعدة ترمي اوجاعها عالارصفه
قالت
فوقت علي سني الكبير
وان عنيها كانت خضرا
من جمال ما كانت بتحلم ببكرا
واي حد كان بيتمني منها نظره
نُدره وكانت شيفاهاا ف نفسهاا
وان الدنياا ضحكت عليها ومانصفتهاش
شايفين جمالي اللي راح ببلاش
وعلي الرغم من جمالها بتقول
ان قطر الجواز فاتهاا
وان ابوها حرمها من فُرص
بلاش دا طمعان فيكي
وبلاش دا اقل منك
وان لسه قدامك عُمرك وسنك
كلامها كان متوتر لكنها كانت جميله
كلامها كان مع مجموعة بنات جامعه
وبرغم مرحهم وشقاوتهم اللي ركبو بيها القطر
الا انهم كانو بيسمعو وبيحضنونها بعيونهم حتي منهم بنت دمعت وحاولت تخبي عنها كل واحده بمشاعرها اللي حاولت تخبيها وتحضنها
البنات دمعتها قريبه في الغالب
قارب نُصه في الهوا والباقي في الميا
مفيش حد بيضحك وجواه فرحان 100%
مش كُل حد بيبكي بنحس بشعوره لما يحكي القضيه
مش كل حاجه جوانا بنعرف نقولهاا
ولا اي حد زينا هيحس بتفاصيلهاا
الدُنيا ليها جِميل وجَميلها في ضحكة العابرين
ورد جوري بيفتح لينا امال لمين
بنكبر من حكاوي الناس ونعيشهاا لبعض الوقت
شفت واحد قاعد لوحده ف ايديه ورق وبيبتسم للحكاوي اللي سامعها او حاجه لمسة قلبه بيفتكرهاا او لبنت صوتها عالي هناك قاعدة بتترسم
شفت زوج وزوجه واولادهم ووشوشهم بتقول في كلام متأجل مابينهم
صاحبي قالي اللي يشوف بلاوي الناس تهون عليه بلوته
اللي هناك دا من زمان وف قلبي محبته
تعرف ياصاحبي كل حاجه ليلة فرحي اتحركت جنبي من الفرحه حتي جسمي
الا قلبي
كتب كتابها لما اتكتب
كُنت اسمي المُتخاذل المُنسحب
حقك عليا يابنت الناس والأصُول
وعارف أسفي مش مَقبول
في حاجات تبدو لينا ان احنا بنختارها وفي الحقيقه احنا مااختارناش
فُلانه وفلان الساكتين قدامك كلامهم المتأجل عني أناا
أنا حبيبها وهي الهواا
البنات نُص الدُنيا
بيهم شعورنا بيكتمل
بنت ممكن نظره منها
يقف عندها الزمن
البنت نُص الدُنيا بِطَلبها
وهي الدُنيا لو بس هي تُدرك معني وجودهاا
ورد ف أرضي أنا أسقيه
اشم عبيره واسترضيه
يسُر عنيا أشوف براح
قبل ماتطلبني أكون مُتاح
لو رُحت ريحتك ترجعني
الكُون برضاها مابيساعني
مش بتتقاس بمين أقوي
ولا حد فينا لوحده يعيش
في حاجات بينا هي الأقوي
بنفتكرهاا عشان نعيش
نفسك شيطانك والهوا
مين يراودهم غيري أنا
وأنا الشاعر ✨
وكُل دُول من وَحيي أناا
✍🏻 اسلام حميدة
