كواليس الرحله بتاع بلطيم.. بقلم/ عاصم المركبى
إيدي إنجرحت
نقطة بنقطة جسمي بينزف
صورة قديمة
لوحده نِستها منذ زمان
إزاي لسّه الدم فاكرها لحد الأن ؟!
زى الشارع
والجارسون
و الشاي
كل ده لسّه فاكرها إزاي ؟
كل التفاصيل رسماك بالنص
إمبارح كنا أكيد مع بعض
بيتهيئلى شربنا القهوه
إتفرجنا على فيلم “رسائل البحر”
سمعنا “فريد”
ولعبنا الدمينو
لا ماحصلش
حصل
ماحصلش
أنا عايش حالة لزق و قص
أو موقف دايما ما بيكملش
بصيت على الأوضه
ع المكتب
ع الشاشه
ع الـ …
ع الحلم
ع العناوين
مش لاقى دليل …
على عرض الفيلم
أو حتى “فريد”
وإن كنا شربنا القهوه
فين الفناجين ؟
ثم إن البيت مافهوش دمينو
وانا أصلاً ماعرفش ألعبها
كان لازم فى بعادك تخْدى :
الشارع
والناس
و القهوه
وتصفي الدم من الشرايين
تلغي الأفلام
و الغُنا
و اللعب
كل المعروض جوه الفتارين
كواليس الرحلة بتاع “بلطيم”
وأغاني “حليم”
حذف الأحداث اللى ما بِـنّــا
ها تخلي بِعادك شيء عادى
و هاعيش الواقع مش تخميّن
كائن متسطب
ماخرجش على النص المكتوب
بيمارس يعني
بيروح الشغل
يشغل تفكيرة زيادة يوليو
يغضب من حادث إرهابي
يشجب فى الذكرى المئوية لتهويد الأرض
متحفظ على بعض القوانين
أحياناً يسمع “فيروز”
بيحب
بيبعد
بيقرب
وكإنه روتين
