حب وضحك من القلب بقلم : عزة حسين
حب وضحك
من القلب
بقلم : عزة حسين
كبرت ايوه كبرت
لا زعلت ولاحزنت
بالعكس فرحت
مشوار طويل
يشهد بأني
كافحت تعبت
وعلى كتافي ياماشلت
هديت ورقت نضجت
قلق وتوتر خلاص
من دماغي شلت
لابفكر في ماضي
ولابخاف من مستقبل
في اللحظه
بس وعشت
ولو مشكله
بحلها براحه
خت ايه لماتعصبت
واغضبت وثورت
حرقه دم وهم وغم
مليون معركه دخلت
خسرت وكسبت
فشلت ونجحت
جريت واتعثرت
اتفرمت واتعصرت
وقعت وقمت
وكله على اعصابي
وصحتي وشبابي
قليل ضحكت
وبكيت كتير وتعبت
وناس غاليه قابلت
وناس مؤذيه
ازاي عليهم صبرت
غربلت وغربلت
وقليل بقيو
و معاهم كملت
واللمه الحلوه دلوقتي
مع ولادي واحفادي
اعظم انجازاتي
وبعدهم علمي
ونجاحاتي وكتاباتي
اديت رسالتي
ومسؤلياتي
عايشه حياتي
لاهممني مين
قال ولاعاد
ولامين مشي
ولامين اسي
ولامين غدر
ولامين نسي
ولامين افتكر
ناس كتيره شطبت
وناس جديده ضفت
صحبات حبيبات
فسح ورحلات
متفائلين ومبهجين
حب وضحك
من القلب
معاهم ارتحت
ومن ربي اكتر
واكتر قربت
حج وعمرات
وقعدات ذكر
وللقران حفظت
ايوه كبرت
بس جوايا طفله
شقيه بتقولي
لسه شويه
مانا على صباي جرت
وعدى العمر لمحه
وقالي اتسرقت وضعت
ولما فهمت وفوقت
شعري بالحنه صبغت
وبسرعه عايزه اتهنى
واعمل مابتمنى
وكفايه حسن السير
واعمل لاخرتي خير
وروحي للسما تطير
وتقول بأعلى صوت
صبرت والله ونولت
وبالجنة بعملي فوزت .
