القصيدة: بين الخوف واليقين كلمات الشاعره: قدريه مصطفى

القصيدة: بين الخوف واليقين

للشاعره: قدريه مصطفى

،🥀🥀🥀🥀🥀🥀🥀
إحنا واقفين بين خوفٍ وبين يقين
شايلين وجعنا… ومش باينين للتايهين

الدنيا حوالينا ضجيجٍ وأنين
وإحنا في صدر العاصفة… ساكتين وصابرين

نمشي على جمر الليالي سنين
والحلم جوّه القلب لسه متخبي ومصون فينا دفين

نخبّي الدمع… ونقول إحنا قادرين
نرمّم الروح المكسورة… ونصبح بعد الوجع طيّبين

يا ليل طوّل… بس إحنا مش مستسلمين
إحنا ولاد النور… حتى لو مش شايفين

نمدّ إيدينا لبعض… نكون جابرين
نقسّم الخوف بينّا… ونرجع أقوى متماسكين

لو باب الأمل اتقفل… نفضل واقفين
نرسم على الحيطان فجرٍ… ونحلف إننا صابرين

قلوبنا رغم التعب لسه نابضين
وفي الدعاء صوتٍ خفي… بيردّد: أنتم محفوظين

يا صاحبي مهما الطريق باين حزين
اللي اتعلّق بربه… عمره ما ضاع من السنين

نغرس رجانا في أرضٍ عطشانة سنين
ونرويها صبر… تطلع لنا وردة يقين
لو الخوف حاصر خطاوينا… إحنا سابقين

نعدّي الظلمة بخطوة نور… ونصبح ناجين
مهما الألم يوجع… إحنا قادرين
نكسر قيود اليأس… ونقوم بعد ما كنا واقعين

ده الليل مهما طال… مش دايمين
والصبح وعد ربّاني… للمتعبين الصابرين

وإحنا هنا… بين وجعٍ وحنين
نحيا بقلوبٍ مؤمنة… ونمشي ثابتين مطمئنين