عينيك

في البحر كنت بشوف عينيك
شراع لمركب حبنا
انت وأنا
كأن موج بيلاقي موج
يبكي ويحضن دمعته
كان كلمته
إن الحنين ربكة وفوضى منظمة
كان السما
واسعة لدعوة قلبنا
لسة السما
برموش سحابها تودنا
شوف المطر
وابقى افتكر
انه عشان حلم اتخلق
صدّق عشان قلبي صدق
لو نفترق
نفس المطر
لازم هيتبدل بكا
والدربكة …
هتكون أنين مش بوق فرح
يا حبيبي ليه قلبك جنح
عن حلمنا
ومين جرح !
انت . أنا ؟
ولا الهنا …
مبقاش مكانه عندنا
مع إن لسة الشمس في طلوع النهار
بتغازل البحر الحزين
لسة الأنين ..
موصلش لحدود السما
ممكن أوي
كان حلمنا
مركب ورق
واللي بيملاه الحنين
في الموج غرق
ممكن أوي
موجة السنين
باعدت إيدين
كانوا لنا
ممكن أوي
نفس العينين
اللي زمان
كانوا حياة
وشراع أمان
دابوا في أيام الزمن
ممكن تحس بغربتك جوا الوطن
تصبح بتتمنى الرحيل
بس التراب في القلب حيل
بادي الوطن
يادي المجاديف اللي فينا اتكسرت
واتعثرت ..
تكون سبب . تكون نجاة
با دي الحياة
اللي معاندة نفسنا
انت وأنا
الدمع سيل
وعينيك شراع المستحيل
والبحر حاسب خطوته
من سطوته
كان الأخير
لما انتهى فيه كل شيء
لما الغريق
داب جوا حضنه م الأسى
صبح ومسا
كام مرة عدوا
واتنسى
ويا بحر شايل اسمنا
انت وأنا
على قد ما اديت قلبنا
كان كل صبرك صبرنا
فيك سرنا
يا نخطي بيك أرض الحياة
يا ندوب معاك
ونكون أسامي تتنسا
قولي في جوفك كام ألف آه
ماتت بموت الغرقانين
صبح الأنين
كأنه ماضي لم يكون
فين العيون العاشقين
فين المراكب والشراع
كام ألف ضاع !
طب ليه حاولنا
وليه أملنا …
رغم الخطر ، أرض الحياة !
يمكن هنوصل !
جايز عسى !!!