الشاعرة قدرية مصطفى تكتب نجمة في سمع قلبي 

نجمة في سمع قلبي

بقلم الشاعرة قدرية مصطفى

يا نجمة فوق في السما… روحي تعلّقت بيها

ببصّ لها كل ليل… وأقول يا بخت اللي حواليها

دي مش بس حكاية حب… دي الروح لما تناديها

دي نبضة قلب بتصحى… أول ما تجي سيرتها

جوايا كلام بحور… موج الشوق مخبّيها

عايز أقول وأحكي… بس رهبة قربها تخوّفني عليها

أنا تايه بين خطوتين… أقرب ولا أسيبها

وأنا عارف إني بعيد… وهي العمر بما فيها

بلف حوالين طيفها… زي القمر في مداها

وأحضن خيالها ليا… وأعيش العمر في حكاويها

صوتها لو يوم يناديني… الدنيا تفرش رضاها

ده صوت دافي حنون… يشفي الجرح ويهداها

ودقّات قلبها نغمة… كروان بيغنّي في لياليها

وأنا قلبي عايز يعزف… لحن الشوق على ايديها

وأدوب في إحساسها… وأسيب روحي لخطاويها

وأبقى أنا وهي لحظة… مفيهاش غير هواها

حبيت الحلم عشانها… والوهم كمان حلاها

وبقيت شايفها في كل شيء… في النور وفي دنياها

دي ساكنة جوا روحي… وروحي عايشة للقاها

حتى في بعد المسافة… قريبة جوايا وانا جواها

نفسي أفرح معاها… وأرقص بين إيديها واطير في سماها

وأقولها إني الوحيد… اللي قلبه اختار هواها

بس الخوف مقيّدني… وساكت ومخبي حكاها

وأفضل أكتب رسايل… من قلبي ومبعوتة لسناها

ولو يوم الزمن رقّ… وجمّعني الطريق بيها

هقولها كل اللي فات… وازرع عمري في إيديها

ولو مكتوب أبعد عنها… وأعيش العمر مش ليها

هفضل أحبها بصمت… وأدعي ربنا يحميها