البخل العاطفي وتدمير العلاقات

البخل العاطفي وتدمير العلاقات .
بقلم د/ شيماء سمير .
استشاري الصحة النفسية والإرشاد الأسري والعلاقات الزوجية .

لما بنسمع كلمة بخل أول حاجة بتيجي في دماغنا هي الفلوس.
لكن الحقيقة إن فيه نوع من البخل ممكن يوجع أكتر بكتير وهو البخل العاطفي.
ممكن تعيش مع شخص بيصرف ويوفر كل الاحتياجات، لكن عمره ما يقولك وحشتني أو حتى يحضنك وقت ما تكون محتاجه.
وساعتها بتحس إنك مع شخص موجود بجسمه لكن قلبه بعيد.
البخل العاطفي مش معناه إن الشخص مش بيحب ساعات بيكون بيحب فعلًا لكن مش بيعرف يعبر
والمشكلة إن الحب اللي ما بيتقالش وما بيتحسش مع الوقت بيبقى كأنه مش موجود.
تأثيره على العلاقة
البخل العاطفي بيقتل العلاقة ببطء.
في الأول هتقول: معلش دي طبيعته.
بعدها هتبتدي تشتكي.
وبعدين هتسكت.
وبعدها هتبطل تستنى منه أي حاجة.
وده أخطر مرحلة لأن لما التوقعات تموت بيبدأ معاها جزء كبير من العلاقة يموت.

الشخص اللي محروم من الاحتواء بيحس إنه وحيد حتى لو شريكه جنبه كل يوم.
وبيفقد إحساسه بالأمان وثقته بنفسه بتقل ومع الوقت بيبدأ ينسحب عاطفيًا لحد ما العلاقة تبقى مجرد روتين من غير روح.