استرها يا ستار بقلم الكاتب/ محمد خفاجي

استرها يا ستار

بقلم الكاتب/ محمد خفاجي

المشكله مش في الجنيه و الدولار

و لا اللي بيلم فلوس الخلق بالملايين

اللي طمعان و اللي غرمان و اللي هدّ الدار

المشكلة في الناس

اللي هان عليها دينها بديونها

و باعت حلالها بحرامها

و فرطت في الأحلام بعبثيّة الأفكار

المشكلة في ارتفاع الأسعار

اللي بقت علينا حطب و جمر و نار

المشكلة مستقبل شبّ و جهاز عروسه

في الدوا و المضاد و المسكنات و اللبوسه

في نقص علاج الغباوه و الغش و الاستحمار

المشكلة في البصل و الطماطم و الخيار

في فاتورة الميه و الكهربا في البنزين و السولار

في الكرنب و محشي ورق العنب في الكوسه

في الفقرانين اللي لا فاكهه طايلين و لا حتى خضار

المشكلة في منظومة صحة خربانه

و وزارة تعليم صدمانه

و مسؤولية لتّاته و فتّاته و عجّانه

و سياسة التسول و التصبير و الانتظار

المشكلة في وطن بينهار

و مجاعة بتقرب و خراب و دمار

المشكلة فينا احنا

يوم لما تاه الأبرار بين جحافل الفجار

الشيله تقيله مقولناش حاجه

بس حرام بعد الشدة و الاختبار

ننسى نرجع لربنا و نِهمل فضل الاستغفار

محمد خفاجي