الي عايز يمشي يمشي بقلم✍️ الشاعر / محمد عبد الستار
بقلم الشاعر / محمد عبد الستار ✍️
الي عايز يمشي يمشي
الي عايز يمشي يمشي .. احنا مش قافلين بيبان
والي يخرج من حياتنا .. لو رجعها مرة تانية ..
مش هايلقي ليه مكان
والي سابنا بحجة بايخه .. والي خان العشرة مرة
مستحيل نديه أمان
مش هانقبل نبقي فترة للقلوب تتسلي بيها
او نكون فترة علاج ناس مريضة ونداويها
احنا بنبيع الي باعنا
والقلوب الي اشتريتنا نبيع حياتنا ونشتريها
دي الأصول والعشرة أخدت من حياتنا و بوخت
خليتنا نتمسك بناس طلعوا فترة وانتهت
والعشم جوانا مات لما مات الأصل فيهم
ألف رحمة علي القلوب الي صانت واتأذت
مش هانمسك حد سايب أو نصون عيش الي باع
أو نقول كلمة واحشنا للي قال كلمة وداع
حتي مش هانجيب سيريتهم زي هما ماعابوا فينا
هما عابوا من خيبيتهم واحنا خيبنا في وقت ضاع
كل واحد خد شوية وساب علامة جرحه فينا
كل يوم بتزيد علامة واحنا توبنا واكتفينا
توب طيبتنا ماعدش توبنا هو داب لما احنا دوبنا
شافوا طيبة القلب عيبنا واحنا بطلنا ونسينا
ده البكا علي حد راح من حياتنا نقص عقل
واحنا مش خزان جراح
احنا لو قررنا ننسي
فالبشر نسيانها سهل
اسألوا الناس الي باعوا حتي لو بالاسم أهل
والصحاب الي نسيناهم لما بان الغدر منهم
والحبايب الي خانوا واحنا كنا بنآمنهم
والي نسيوا سنين معانا .. والي بينا دم واحد
مهما دار الوقت بينا عمرنا مابنفتكرهم
