خلص الكلام ....شعر عماد الفايدي خلص الكلام وخسارة فيكم ياعرب حتى الملام وخسارة حبري والورق ياشعب اخره يقول كلام وهتاف ونجمة بتتحرق كان نفسي اقول فيكم هجاء حتى الهجاء مستخسرو كان نفسي أضرب بالحذاء كل اللي نامو وشخرو بس انتو اموات كلكم والضرب في الميت حرام طاطو كمان بيعو الكرامة وطبعو وانسو اللي جاي وانسو اللي كان فوق العروش اتربعو هو انتو عربان ياعرب ؟ ولا انتو ايه يابلد جهادها غنى وطرب ماتقولو ليه ليه المبادي اتبدلت واتعدلت وتحولت ليه كل صوت بتكمموه ليه الدياثة اتقدست ليه كل عجل بتعبدوه ؟ ليه كل نخوة بتحرقوها بجُبنكم ليه كل حر مهواش منكم هو انتو عربان ياعرب !!! ولا انتو صح ولاد حرام ؟ مش هعتذر ولا منتظر منكم أراء ولا هكتب الشعر بحذر وماعدش عندي غير هجاء الدم دا مش دمكم !!! مش اهلكم مش منكم ؟ النفط ليه غالي أوي ! والدم مبقاش له ثمن ليه ناس بنيران تتشوي وناس تسابق ف الزمن يا أهل غزة أنتم الأحرار أنتم حماة العرض والاديار أما العروبة لا تزال موادعة خزي يخُلف ألف عار وعار وإن سألو عن النخوة عن الأنفة عن العزة هقول انها حطت رحالها كله في غزة سلام الله على غزة على النخوة على العزة على الشعب اللي بيعاني من الجاني ولا هزو ف يوم هزة وكل الخزي للبايع وللخاين وللي مساند الحاخام وللي شاف ومعاين وقادر ينسى ولا ينام عروش فاضية ومش فاضية لأن سيوفها مش ماضية ولا قادة ولا حُكام خلص الكلام وخسارة فيكم ياعرب حتى الملام
