ارجع يا زمان طه ابراهيم عايزني ارجع زي زمان قل الزمان ارجع يا زمان وهات لي شعر وطقم اسنان لا باروكه تنفع ولا كتان وكمان سنان تعرف تمضغ في عز ليل الضلمه تبان وعينيا بردو باقت شيش بيش ما بقتش اميز في الالوان وان قلت مره اخرج م البيت العقل يدخل في التوهان وان قلت مره ازور صاحبي اخش واخرج كام دكان وان قلت يا ابني امسك ايدي تطلع نفيسه او إحسان واتوه كمان حوالين بيتنا مابقتش فاكر ولا عنوان ولا حتي ايه كان امبارح والعقل فيه حبة قلبان ووداني صبحت مسدوده ما بقتش اسمع كنا وكان حتي الكلام والحدوته ايام زمان وليالي زمان حتي الدماغ بقي بيفوّت زي التروس في عامود كردان وحاجات كتير غيرها تموت وكأني عايش في مرستان وباقت كمان محتاج قوه لا عافيه دايمه ولا مرؤه وليلاتي ... اقعد .... اتوجع من غير مرض بس انا تعبان محتاجلي طقم من الحكما يقولولي ايه ينفع ليا والصحه ترجع زي زمان لو حتي ساعه في عصريه وارجع شباب وسط الجدعان والصحه ترجع ع الخدين زي الورود وسط البستان لكن دا حلم ماهوش عادي ولا حاجه ابدا في الإمكان اصل الحياه مش علي كفنا الكون كمان بكره هايفني حتي الشيطان اللي ارفنا هيموت كمان وكأنه ما كان
