المجرة برا المدار شعر/صابرقدح خد ديلك ف اسنانك وبلّغ فرار المجرة طالعة برا ....المدار والحلم اللى احنا عايشينه طلع للأسف حبة غبار المجرة جرة اخلاقنا للغُسل وايه يغسل السفالة والعار والكفن محتاج كفن المسرحية بتخلص نزلو الستار المجرة جرة معاها احلامنا كل شوية بتغير مسار خد ديلك ودوّرلك على خُّن اوعاك تظن ان الدنيا موضع قرار انفد منها بضميرك المجرة صارت صالة قمار الكسبان فيها خسران والخراب مثبت فيها مسمار الخلاعة بتفتى ف الدين وشئون الديار والنسوان المسترجلة عايزاها دمار فاتحة صدرها لحد صرتها والرقاصة كانت معتبراها عار ازاى تبين مكان ولدها لامها ماعادش فيها اللى يتسمى اسرار غريب وهاتموت فيها غريب لاعاد فيها حبيب ولا جار والشمس مش قادرة تطلع مخنوقة بشوية عُفار والحضن عشان يدفيك محتاج رزمة دولار والناس علشان تعيش وسطيهم لازم تعمل ضهرك حمار يادنيا التفاهة بقت ليكى عنوان والغل بقى فيكى عمار والدم اللى كان بيجمعنا أصبح مية متلونة بحَمار والود بقى حلم ف عز النهار والدم ماعادش فيه دم دى سحابة شبعانة مرار حسابات الناس كلها ملايين والناتج ف كل معاملة أصفار الفرار صدقنى أحسن قرار خليها تمشى واحنا عيزنها ف ايه الجد فيها أصبح هزار ايه المعنى انك تعيش بدون هدف حوالين رقابينا مليون حصار خد ديلك ف اسنانك وبلّغ فرار الحلم انك تعيش ف سلام... قرار دموعنا مش قادرة تمسح آسانا خد ديلك ف اسنانك وبلّغ فرار. مستحيل الغلب يبقى علينا أقدار المجرة جرة معاها قطع من جهنم استديوهات دعارة وصالات قمار فيها ناس بتتسمى قرايب ف عنيهم بنادق بمليون عيار نفسهم يشوفوك ف مصيبة أو يقلعوك كأى قطعة غيار لاصعبان عليهم صلة الرحم ولادار فى فكرهم تذكار المجرة مليانة قصص ولا الف ليلة وليلة ولّا أشعار ونسوان بتحلل ف الرذيلة وأشباه رجال فُجّار لابسين توب الفضيلة ماتعرفش هما مسلمين ولا كفار أجندة ومفروضة علينا لأ... وبيسموها حوار يسترها ربنا علينا شكلنا رايحين على انفجار المجرة ياميت ندامة عليها علب موت بايد الكبار والصغار والإسم بيرسموا خريطة المستقبل وهما بيدفعوك للإنتحار وقال ايه عاملينها لعبة تدفع تمنها جد وهزار يقنعوك بالهزيمة ويشوهوا فرحة الانتصار يعتبروك فيران تجارب وهما فى الحقيقةاولاد فَرار بيترعبوا من إيمانك دينك ياواد بجد هو العمار وان كنت عايز تفرح بجد فربك ثم ربك هو العز والفخار إيمانك جبل راسخ إياك يهزه حب الدنيا وزغللة الدينار الكل فانى إلا ربك هو الباقى وهو الغفار ومهما ضليت مستنيك تنده يهديك ..ويعدلك المسار بيضيقواعلينا ويخنقونا ويعملوا علينا مليون حصار وحياة سيدنا النبى هانعيش ونموت أحرار بيبنوا لينا كل يوم سور هانكسر ليهم كل الأسوار الجنة عند ربنا والدنيا دى صالة انتظار والحياة مجرد رواية بتتقسم فيها الأدوار ودور البطولة للى بيضحك ولطريق الخير يختار المسرحية انتهت نزلو الستار نزلوا الستار صابرقدح
