سلمى عبدالكريم: دورى فى “ساعته وتاريخه” ملىء بالمشاعر .. وشكرًا لدعم الشركة المتحدة
قالت الفنانة الشابة سلمى عبدالكريم، إنها سعيدة لنجاح شخصية “ليلى” ضمن أحداث الحلقة الأولى من مسلسل “ساعته وتاريخه”، حكاية “تلصص”، والتي لاقت تفاعلًا كبيرًا ونجاحًا عبر منصات السوشيال ميديا، خاصة بعد المرض الذي ظهرت به.
وتابعت الفنانة سلمى عبدالكريم : “الحمد لله طبعا على مشاركتي في المسلسل يعنى إن الواحد في بداية مشواره يشتغل مع مخرج مهم جدًا زي أستاذ عمرو سلامة وشركة كبيرة زي المتحدة ده حلم لناس كتير جدًا”.
وأضافت: “دوري فيه مشاعر مختلفة كتير أوي، وكنت متأكدة إن ناس كتير مش هتحب الشخصية بس قولت لو فيه ناس فهمتها وعاشت معاها تقلباتها من إن هى متهددة وعندها مرض والولد ضاحك عليها بكلام مش حقيقي وبعدين تتصدم بالحقيقة من البنت وتصعب عليها وتقرر تكون شجاعة فجأة قدام الولد وبعدين الانهيار في النهاية”.
وأوضحت: “يعني في ساعة واحدة البنت عاشت كل الحالات والأحاسيس وده طبعا صعب جدًا، والحمد لله جالي تعليقات كتير زي، أنا حبيتك وكرهتك وصعبتي عليا في نفس الوقت، ودة هو النجاح بالنسبالي الحمد لله”.
وعن طرح مرض السمكة المتعفنة ضمن أحداث المسلسل، قالت: “أكيد دي حاجة مهمة لإن فيه ناس فعلا بتعاني من الموضوع دا وفاكرين إنهم الوحيدين المصابين بده وفيه ناس بتبقى مش عارفة إنه مرض أصلا”.
وعن تصدر الترند، قالت: “أنا بعد الحلقة لما فتحت السوشيال ميديا وشوفت صوري في كل التايم لاين مكنتش مستوعبة، وشكرًا دائمًا للشركة المتحدة للخدمات الإعلامية على دعمها المستمر لينا، وثقتها فينا بإسناد البطولة الأولى لينا في عمل مهم كمسلسل ساعته وتاريخه”.
