الرحـله خطـاوي ..نص عامي غنائي للشاعر: معوض حلمي
الرحله خطاوي بنمشيها
والرزق ف علمـك متعان
يارب ان قسيت دنيتنا
خليــك ويانا ف سـكتنا
وامسـح بحنانك دمعـتنا
طمـــنا دا انت الحـــنان
الرحله خطاوي بنمشيها
والرزق ف علمـك متعان
الشمعه المطفيه ف بيتنا
معادتش بتسـرج حتتـنا
الدمعه بتسرق ضحكتنا
من كتر الجـور والبهـتان
الرحله خطاوي بنمشيها
والرزق ف علمـك متعان
في البحر مراكب سكرانه
م التوهه بتزيد في أسانا
بشراعها المفرود واخدانا
لبحور الضيم والأحـزان
الرحله خطاوي بنمشيها
والرزق ف علمـك متعان
بنحــايل وبكـل طـريقه
وبأمرك لو حاله خنيقه
تفرجـها وتفـك الضيـقه
وترجــع غناوينا زمــان
الرحله خطاوي بنمشيها
والرزق ف علمـك متعان
راضيين والله بأقـدارنا
إحمينا واحفظ مقـدارنا
ع الصعب يارب وقدرنا
وبحلمـك دفيـــنا كمان
