بعد ما وضحنا اساسيات لازم تتاخد في الاعتبار وانت بتتعامل مع المراهق
هنتكلم عن شوية تفاصيل عن المراهق وندخل للعالم الخاص بيه
المراهق قليل الخبرة كتير الكلام وعنده كل حاجة سهلة، مافيهاش مشكله هيتعامل معاك علي انك محفظة فلوس هيحقق احلامه من خلالك ومتصور ان المفروض كل طلباته مجابه، هيبتدي اول صدام بينه وبين الاهل اول ما يسمع كلمة ( لأ ) لأ مش هينفع تعمل كذا او تروح المكان الفلاني أو تشتري الحاجة دي
كلمة لا بتوتره، بتخليه يشوفك بعين الحاقد اللي مش بتحبه والاب الجاحد اللي بتحرمه من أبسط حقوقه
المراهق دايما شايف ان معاه الحق وان طلباته بسيطة وسهلة ، ولازم تنفذها له ولما تعترض هتلاقيه اتغير في معاملته يعني لو كان بيصلي ويذاكر ومنتظم هيبطل يعمل الحاجات اللي كان بيعملها عشان تتلبي رغباته
هيتعامل بنظام لوي الدراع بمعني انه هيحسسك انه بيذاكر ويصلي عشانك مش لانهم واجب عليه وفرض
وانت بتكون قدام اختيارين لاما هتصمم علي موقفك وترفض طلبه
لاما هتساومه وتتناقش معاه عشان توصل لحل وسط او تقنعه انك ممكن تنفذ طلبه بس مش في الوقت الحالي وتشرح له ظروفك عشان يقدر ،
وموضوع انك تشرح له ظروفك وامكانياتك دي مهمه جدا لان المراهق لازم يقتنع عشان يسمع كلامك ، وكمان لما بتقعد معاه وتفهمه بتحسسه بقيمته وانك مقدره و شايفه علي قد المسئولية
وكل ما هتقرب منه ويكون بينكم لغه حوار من غير رهبة او خوف هتكسبه اكتر وهتسهل أمور كتير بينكم ممكن كانت تتعقد لو ماكنش فيه حوار بينكم
