مليون سلام وتحية صابر قدح
مليون سلام وتحية
صابر قدح
يافاردة شراع الأمان على قلوبنا
وواخدة بزمام الأمور على دروبنا
تشدى وترخى علشان بلدى وولدى
تمدى الخطوة وتداري فعيوبنا
يافاردة الطرحة بالجامد
على اللى يعاند
ويمشى في طريق غيه
وتعِسّى وبتمَسّى على اللى تاه ليله
وتحافظى على جيله
من اللى من برة بيجيله
وبتجيبي الكلب من ديله
تخافى م الشياطين زيه
مهو طريق الضلال غية
يعيشها زى مايكون
للحمام غية
قالولى دا الخراب شاطر
وانا عارف انك فى كل الاوقات
حاضر
تقيدى لبكرا والحاضر
نجوم على الأكتاف وبتلالى
وراس بالانوار مالى
وانا مالى دا ليل الصبر موالى
تحافظى على جيبى وعلى عيالي
ياشايلة الهم من بدرى
تحافظى على قوتى وراس مالي
نسيب الدنيا وننام
وانت صاحية طوالى
تضمينا وتلمى من الليلة
احلام زايفة وهليلة
ياقصيدة حب قلناها
ياشارطة علينا نحافظ
على تلالى وعلى جبالى
القمر فوق وانت فوق القمر
بتلالى
مايحلا ليكى نوم وانا
كل ليلة بيحلالى
الدفا الاقيه ف سريرى
وانت الدفا ف عز البرد
والشوارع بتلف بيكى
واناديكى الاقيكى
تشدى الغطا على عيالي
يا شارطة ان ماتكونش القضية
فيها سوء نية
وبتسامحى
وكتير بتدفعى الدية
وكل اللى بتدفعيه ليا
امان ووصل ومداوية
قدمتى عشاننا كام شهيد
وحفظتى ع الأمن فى الزحمة والعيد
ونسجتى خيوط من الحكمة مع ولادك
عشان العيد يكون مليون عيد
يانسر النصر ونجوم مضوية
ومتوضية بنهر النيل والمعدية
تصلى الفجر ف السلوم وأسوان
وكل الحدود مابين ايديكي معدية
اشارة مرور ومتحكمة فيها
وسلامة العقل والأبدان
ياعايشة في حرب عشان نعيش ف سلام
مابين الخلق بتنقى الكلام
وكل مانشوف ليكى إنجاز
نلاقينا ناقصين علام
ياحارسة ع القلب من الدخان
وبتصحى الشباب من التوهان
حدود الرؤية عندك مداها سنين
وحظوظ النباهة مليون فدان
وخدمة الشعب عقيدة وإيمان
ألاقي منين كلام ليكم واحييكم
تعظيم سلام للى واضع روحه على كفه
يقدمها هدية للأوطان
تعظيم سلام للى بيحافظ على كرامة الإنسان
ياعيون سهرانة يكفاك شرف بكلام رسول الله
عين بكت من خشية الله وعين باتت تحرس في سبيل الله
يافاردة شراع الأمان على قلوبنا
وواخدة بزمام الأمور على دروبنا
تشدى وترخى علشان بلدى وولدى
تمدى الخطوة مليون خطوة
على حدودنا
ونقوم وننام على حسك
عيون سهرانة بتسلم وردية لوردية
تعظيم سلام ياشرطة بلادى
الشرطة المصرية
ومليون سلام وتحية
صابر قدح
