الخسارة المختارة ” الفرق بين التخلي والاستسلام “

الخسارة المختارة “الفرق بين التخلي والاستسلام “

بقلم د/شيماء سمير .

استشاري الصحة النفسية والإرشاد الأسري والعلاقات الزوجية. 

*في لحظات بتلاقي نفسك واقف قدام قرارين بيشبهوا بعض من برا بس من جوه مختلفين تمامًا

إما تتخلي أو تستسلم 

الاتنين خسارة والاتنين نهاية 

للأسف دايما بنخلطهم ببعض 

لمّا حد يسيب شغل كان بيتعبه أو علاقة كانت بتنهش في قلبه أو حلم اكتشف إنه مش حلمه  

الناس حواليه بتحكم على طول انه استسلم 

بس ما حدش بيشوف اللي جواه هو ايه 

بالظبط زي الفرق بين اللي حط حاجة على الأرض لأنه فهم إنها مش بتاعته وبين اللي وقّعها لأن إيديه تعبت من الشيل 

الاتنين وقفوا الاتنين مشيوا بس اللي بيفرّقهم مش اللي حصل لكن هو الطريق اللي وصّلهم لكده .

*فيه فرق كبير بين الاستسلام والتخلي 

الاستسلام بيبقي لما إرادتك تنكسر

الاستسلام هو إنك توقف وأنت لسه عايز بس الخوف فيك أكبر من الرغبة هو إنك تمشي مش لأن الموضوع خلص لأنك صدّقت إنك هتخسر قبل ما تبدأ أصلًا وبيبقي الخوف مسيطر عليك وبتقول لنفسك مفيش فايده

وبتسيب اللي أنت عايزه فعلًا مش اللي المفروض تسيبه.

الاستسلام بيسكت الرغبة عندك وبيدفنها وهي لسه حيّة. 

*التخلي هو انك تشوف وتقرر .

هو قرار بييجي من حد شايف كويس واختيار بييجي من مكان واضح جوّاك. 

هو انك تشوف قدامك حاجة كنت بتحبها أو كنت بتحلم بيها وتبقي مدرك فعلا انها مش هتنفعك وتكون صادق مع نفسك انك لازم تبعد .

التخلي دايما بيصاحبه وعي ونضج .

الاستمرار من غير وعي مش مثابرة ده هروب من لحظة الحقيقة.

*في الاخر إنت اللي بتختار مكانك في القصة 

وتسأل نفسك وتاخد قرارك أسيب ولا أكمل 

القرار لو بييجي من الخوف ده استسلام سواء كملت أو وقفت.

لو بييجي من وضوح ووعي ونضج ده تخلي حتى لو كان أصعب حاجة عملتها في حياتك.

*الفرق بين التخلي والاستسلام هو الفرق بين إنك تكون صاحب حياتك أو ضحيتها.